UFC 296 турнирининг битта жанги жароҳат сабаб бекор бўлиш арафасида

UFC 296 турнирининг асосий кардидан ўрин олган битта жанг бекор бўлиш арафасида турибди. Бунга Гига Чикадзенинг жароҳати сабаб бўлмоқда. Ярим енгил вазн тоифаси рейтингида 8-ўринни эгаллаб турган грузиялик аралаш яккакураш устаси ўзидан икки поғона юқорида бораётган Жош Эмметтга қарши октагонга чиқиши лозим эди. 

"Афсуски, сон қисмимнинг мушакларини чўзиб олдим. Тез орада қайтаман!", - дея ўзининг ижтимоий тармоқдаги саҳифасида хабар қолдирган Гика.

Ҳозирча Эмметт турнир кардида қоладими, унга қисқа муддатда жанг бериладими, буниси ноаниқ. Лекин америкаликнинг ўзи бир неча рақибларни айтиб, улар билан жанг қилиш истагини билдирган. Аммо рақиблар қисқа муддатда бу "вызов"ни қабул қиладими? Ҳамма гап шунда. 

Маълумот учун, Чикадзе шу йилнинг августида Алекс Касересни очколар ҳисобига кўра мағлубиятга учратган эди. Унгача 35 ёшли аралаш яккакураш устаси UFC промоушенидаги ҳозирча ягона мағлубиятини қабул қилиб олганди. Ўшанда у Келвин Каттарга очколар ҳисобига кўра ютқазиб, ўзининг 7 та ғалабали сериясига чек қўйганди. 

Америкалик 38 ёшли Жош Эмметт эса сўнгги иккита жангида мағлубият аламини тотиб кўрган. Аввалига вақтинчалик камар учун кечган жангда Яир Родригесга, кейин эса Илия  Топурияга имкониятни бой бериб қўйган эди. Ундан аввал эса у кетма-кет 5 та жангда зафар қучганди. 

Эслатиб ўтамиз, UFC 296 турнирининг асосий жанги ярим ўрта вазн тоифаси чемпионлик камари учун Леон Эдвардс ҳамда Колби Ковингтон ўртасида бўлиб ўтади.