UFC 320 турнири бонуслари: Прохазка 100 000 долларга эга чиқди

Бу сафар аввалгиларидан фарқли равишда 4 та эмас, 5 та бонус эгалари аниқланди. Улардан иккитаси ярим оғир вазн тоифаси вакили Иржи Прохазкага насиб этди. Чехиялик иштирокидаги тўқнашув "Турнирнинг энг яхши жанги" деб топилди. Иржи шунингек, "Оқшом намойиши" учун ҳам бонус олди. Бу билан Прохазка кафолатланган гонорардан ташқари қўшимча 100 000 доллар ҳам ишлаб олди. 

Барча ҳакамларнинг карточкалари бўйича Халил Раунтрига икки раунд натижаларига кўра ютқазиб турган Иржи таваккал қилди ва америкалик рақибини сўнгги учинчи раундда нокаут эвазига мағлубиятга учратди. 

Яна бир бонус чемпионлик камарини қайтариб олган бразилиялик Алекс Перейрага насиб этди. У рақамли мусобақанинг асосий жангида 80 сония ичида россиялик Магомед Анкалаевни техник нокаутга учратиб, ярим оғир вазн тоифасида яна UFC чемпионига айланди. 

Кўрсатган жанги учун бонус билан тақдирланган тўртинчи жангчи америкалик ўрта вазн тоифаси вакили Жо Пайфер бўлди. У иккинчи раундда Германия шарафини ҳимоя қилаётган доғистонлик Абусупян Магомедовни бўғиш усули эвазига таслим этди.