UFC 330 турнири яна бир жангини йўқотди

Бир муддат аввал UFC 330 турнири кардидан Эрин Бленчфилд ва Жасмин Ясудавичус ўртасидаги даъвогарлик жанги ечилганди. Орадан бир ҳафта ўтиб, америкалик ярим ўрта вазн тоифаси вакили Жефф Нил ҳам мусобақада иштирок этмаслиги маълум бўлди. Натижада унинг ҳамюрти Чиди Нжокуани рақибсиз қолди.

Айни дамда ташкилот матчмейкерлари Нжокуани кардда қолдириш учун унга янги рақиб изламоқда. Бу ҳақда таниқли спорт инсайдери Марсел Дорфф хабар берди. Нилнинг жангдан нима сабабдан воз кечгани ҳақида ҳозирча ҳеч қандай маълумот йўқ.

Жефф Нил жорий йилнинг феврал ойида сўнгги бешта жангидаги тўртинчи мағлубиятини қабул қилиб олганди (Урош Медичдан биринчи раундда нокаут билан енгилган). Чиди Нжокуани ҳам кетма-кет иккита жангда мағлубиятга учраганди: у Жейк Метьюсга бўғиш усули билан, Карлос Леалга эса ҳакамларнинг якдил қарори билан имкониятни бой берган.

Агар ўрнига янги рақиб топилмаса, 15 август куни Филадельфияда бўлиб ўтадиган турнир кардида ўн битта жанг қолади. Уларнинг орасида асосий воқеа – ярим ўрта вазн тоифасидаги чемпионлик жанги: Ислам Махачев ва Йен Мачадо Гэрри ўртасидаги тўқнашувдир.