UFC Fight Night 231. Марказий жанг ғолиби очколар ҳисобига кўра аниқланди + ФОТО

UFC Fight Night 231 оқшомининг марказий жанги оғир вазн тоифасида ўтказилиб, унда бразилиялик Жаилтон Алмейда ҳамда америкалик Деррик Льюис ўзаро октагонда тўқнаш келишди. Жанг тўлиқ беш раунд давом этди ва якунда Алмейда ҳакамларнинг якдил қарори билан ғалабага эришди. Жаилтон бугунги жангнинг катта қисмини партерда ўтказиб, асосий очколарини айнан шу вазиятлар эвазига қўлга киритди.  

Бугун Льюис фаолиятидаги 12-мағлубиятини қабул қилиб олди, ғалабалари сони 27 талигича қолди. У бундан аввалги жангида Маркос Рожерио Де Лимани техник нокаут эвазига таслим этган эди. Яқинда америкалик UFC билан амалдаги шартномасини ҳам узайтирганди.

Алмейда эса бугун ўз ҳамюртлари кўз ўнгида фаолиятидаги 20-ғалабасини тантана қилди. Унинг ғалабали серияси 15 та жангга етди. UFC промоушенидаги ғалабалари 5 тани ташкил қилмоқда. Алмейда ММАдаги сўнгги мағлубиятини 2018 йилда Shooto Brazil 80 турнири доирасида қабул қилиб олганди.