UFC Fight Night 232 турнирининг барча натижалари битта саҳифада + ФОТО

"UFC Apex" аренасида ўтган UFC Fight Night 232 оқшомининг асосий жанги ўрта вазн тоифасида ташкил этилди. Унда рейтингнинг 10-поғонасида бораётган америкалик Брендан Аллен ўзидан уч ўрин қуйида жойлашган шотландиялик Пол Крэйгни учинчи раунд якунланишига 38 сония қолган бир пайтда бўғиш усули билан мағлубиятга учратди. 

Аҳамияти жиҳатидан иккинчи жангда мағлубият нималигини билмай келаётган эквадорлик ярим ўрта вазн тоифаси вакили Майкл Моралес австралиялик Жейк Мэтьюзни ҳакамларнинг якдил қарори билан мағлубиятга учратди. Бу унинг UFC промоушенидаги тўртинчи ғалабаси бўлди.

Бироз кутилмаганда россиялик ўрта вазн тоифаси жангчиси Денис Тюлюлин британиялик Кристиан Данканга иккинчи раундда техник нокаут билан ютқазиб қўйди. Денис ушбу жангга оз фурсат қолганида розилик берганди. 

Оқшомнинг асосий кардидан ўрин олган жангда қирғизистонлик Миктибек Оролбай UFC промоушенида муваффақиятли дебют қилди. Ярим ўрта вазн тоифаси вакили бўлган Оролбай иккинчи раундда америкалик Урош Медични бўғиш усули билан таслим этди.

Шунингдек, бугунги турнирда Чейз Хупер, Пэйтон Талботт, Аманда Рибас, Жоандерсон Брито, Хосе Жонсон ва Жека Сараги ўз жангларини муддатидан аввал қозонилган ғалаба билан якунлашди. 

Трей Огден ва Николас Мотта ўртасидаги жанг ҳакамнинг хатоси туфайли ўтказилмаган деб топилди. Рефери Майк Белтран учбурчак усулига тушиб қолган бразилияликнинг мағлубиятини эртароқ қайд этиб, жангни тўхтатган эди.