UFC Fight Night 240 турнирининг марказий жанги сақлаб қолинди

Оқшомнинг марказий жанги ўрта вазн тоифасида италиялик Марвин Веттори ҳамда Брендан Аллен ўртасида ўтказилиши керак эди. Аммо Веттори машғулотда жароҳат олгани учун сафдан чиққанди. Промоушен раҳбарлари қисқамуддатда марказий жангни сақлаб қолишга муваффақ бўлишди. 

UFC ўрта вазн тоифаси рейтингида 14-ўринни эгаллаб турган Крис Кертис италиялик жангчининг ўрнини эгаллашга розилик берган. UFC Fight Night 240 турнирининг янгиланган марказий жанги промоушен матбуот хизмати томонидан расман эълон қилинди.

Эътиборлиси, ушбу жанг реванш мақомида бўлади. Америкаликларнинг ўзаро илк жанги 2021 йилнинг декабрь ойида ўтказилган бўлиб, ўшанда Кертис Алленни иккинчи раундда нокаутга учратганди. Брендан ҳозирча охиргиси бўлиб турган ўша мағлубият учун реванш олишга уриниб кўради. Аллен ўша мағлубиятдан кейин кетма-кет 6 та жангда ғалаба қозонди.