UFC Fight Night 241 турнирининг бонус соҳиблари маълум

Мусобақа ташкилотчилари бугунги оқшомда бошқалардан ажралиб турган жангчилар номини ошкор қилишди. Яъни, бонуслар кимларга насиб қилганини очиқлашди. Туркиялик Ибо Аслан ҳамда швециялик Антон Туркал тўқнашуви бугунги турнирнинг энг яхши жанги деб топилди. Аслан жангнинг учинчи раундида рақибини техник нокаутга учратди. Ҳар иккала жангчи ҳам кафолатланган гонорарга қўшимча 50 000 долларлик бонус чекини ҳам қўлга киритишди. 

Шунингдек, бугунги турнирда кўрсатган ёрқин жанглари учун америкаликлар Нэт Ландвер ва Деннис Бузукья ҳам 50 минг долларлик мукофот пулига лойиқ кўрилган. Нэт жангнинг биринчи раундида ҳамюрти Жамалл Эммерсни, Бузукья эса учинчи раундда Коннор Мэттьюсни нокаутга учратди. 

UFC босслари бу сафар биринчи раундда рақибидан устун келган Нурсултон Рўзибоевга бонус беришни исташмади. Рўзибоев промоушендаги илк жангини ҳам биринчи раундда нокаут билан якунлаган ва ўшанда 50 минг доллар бонусни қўлга киритганди.