UFC Fight Night 249 турнирининг барча натижалари битта хабарда

UFC Fight Night 249 турнирининг марказий жанги аёллар минимал вазн тоифасида ўтказилиб, реванш мақомидаги баҳсда Маккензи Дерн беш йил аввалги мағлубият учун Аманда Рибасдан муносиб тарзда қасос олди. Рефери Марк Смит учинчи раунд якунланишига уч сония қолган бир пайтда жангни тўхтатди. Америкалик аралаш яккакураш устаси оғритиш усули билан бразилиялик рақибасини таслим бўлишга мажбур этди. 

Оқшомнинг ко-мэйнивент жангида аргентиналик яримўрта вазн тоифаси вакили Сантьяго Понзиниббио учинчи раундда Гайаналик Карлстон Харрисни техник нокаутга учратди. Бу билан у икки мағлубиятли сериясига барҳам берди. 

Асосий кард доирасидаги жангда россиялик ўрта вазн тоифаси вакили Роман Копилов жанг якунланишига икки сония қолган бир пайтда америкалик Крис Кёртисни оёқда бошга берган зарбаси билан нокаутга учратди. 

Тожикистон бургути Нурулло Алиев 2025 йилни ғалаба билан бошлаб олди. У Жо Солецкига қарши кечган уч раундлик тўлиқ жангда очколар ҳисобига кўра ғалаба қозонди.

Қолган натижаларга тўхталадиган бўлсак, россиялик аралаш яккакураш усталари Магомед Гаджиясулов ва Виктория Дудакова бугунги турнирда мағлубият аламини тотиб кўришди. Яримоғир вазн тоифаси вакили бўлган Магомед бразилиялик Бруно Лопесга имкониятни бой бериш асносида фаолиятидаги илк мағлубиятини қабул қилиб олди. Биринчи енгил вазн тоифасида жангларини ўтказиб келаётган Дудакова эса иккинчи раундда америкалик Фатима Клайнга техник нокаут билан ютқазди.

Шунингдек, бугунги турнирда Сезар Алмейда, Пунахили Сориано, Фелипе Бунес, Марко Тулио ва Жейкоб Смит рақибларини муддатидан олдин мағлубиятга учратишди.