UFC on ABC 5`нинг барча натижалари: Марказий жангда Топурия ютди, Жумагулов ва Ражабовда мағлубият + ФОТО

UFC on ABC 5 оқшомининг марказий жанги ярименгил вазн тоифасида ўтказилиб, унда асли грузиялик, ҳозирда Испания шарафини ҳимоя қилаётган, UFC рейтингида 9-ўринни эгаллаб турган Илия Топурия америкалик Жош Эмметтга қарши октагонга кўтарилди. Жош дивизионнинг бешинчи рақамли жангчиси эди. Беш раунд тўлиқ давом этган жангда Илия ҳакамларнинг якдил қарори билан 50-44, 50-42, 49-45 ҳисобларида ғалаба қозонди. Бу Топуриянинг кетма-кет қозонган олтинчи ғалабаси бўлди. Унинг ММАдаги рекорди 14:0 кўринишига келди.

Илия Топурия жангдан кейинги интервьюсида навбатдаги рақиби сифатида Александр Волкановски ва Яир Родригес жанги ғолибини кўришни истаётганини айтди. Бу икки жангчи 8 июль куни Лас-Вегас шаҳрида ўтказиладиган UFC 290 турнири доирасида ўзаро тўқнаш келишади.

UFC on ABC 5 турнирининг ко-мэйнивент жанги аёллар енгил вазн тоифаси дивизионида бразилиялик Аманда Рибас ҳамда америкалик Мэйси Барбер ўртасида бўлиб ўтди. Унда Барбер иккинчи раундда рақибасини техник нокаутга учратди.

Қозоғистонлик Жалгас Жумагулов навбатдаги мағлубиятини қабул қилиб олди. У ҳакамларнинг айри қарори билан Жошуа Ванга ютқазиб қўйди. Ҳакамларнинг икки нафари Ван, учинчиси Жалгаснинг ғалабасини таъминлаган. Тожикистонлик Лоик Ражабов эса иккинчи раундда Матеуш Ребецкига техник нокаут билан ютқазиб қўйди. Дэвид Онама ва Брендан Аллен ўз жангларини муддатидан аввал ғалаба билан якунлашди.

UFC on ABC 5 турнирининг барча натижалари

Прелим жанглар:

Седрик Думас Коди Брандэйждан устун келди (30-27, 29-28, 30-27);

Жек Женкинс Жамалл Эммерсни мағлуб этди (27-30, 29-28, 29-28);

Чепе Марискал Тревор Пикни енгди (30-27, 30-27, 30-27);

Жошуа Ван Жалгас Жумагуловни мағлубиятга учратди (28-29, 29-28, 29-28);

Табата Риччи Жиллиан Робертсонни таслим этди (29-28, 29-28, 30-27);

Матеуш Ребецки Лоик Ражабовни иккинчи раундда техник нокаутга учратди (2:36);

Рэнди Браун Веллингтон Турман устидан зафар қучди (29-28, 29-28, 29-28);

Нил Мэгни Филип Роудан устун келди (29-28, 28-29, 29-28).

Асосий кард:

Брендан Аллен Бруно Сильвани биринчи раундда бўғиш усули билан таслим этди (4:39);

Дэвид Онама иккинчи раундда Габриэль Сантосни нокаутга учратди (4:13);

Остен Лэйн ва Жастин Тафа жанги биринчи раундда кўзга бармоқлар билан жароҳат етказилгани учун ўтказилмаган деб топилди (0:29);

Мэйси Барбер Аманда Рибасни иккинчи раундда техник нокаутга учратди  (3:42).

Оқшомнинг асосий жанги:

Илия Топурия Жош Эмметтни очколар ҳисобида мағлуб этди (50-44, 50-42, 49-45).