UFC on ESPN 70 турнирининг бонуслари кимларга насиб этди?

Муддатидан аввал финишлар кўп бўлгани боис, ташкилотчиларга бонус соҳибларини аниқлаш қийин кечди. Морган Шарье ва Нейт Ландвер ўртасидаги тўқнашув турнирнинг энг яхши жанги деб топилди ва ҳар икки аралаш яккакураш устаси 50 000 долларлик бонусни қўлга киритишди. 

Бразилиялик оғир вазн тоифаси вакили Вальтер Уокер ҳам бонусга лойиқ кўрилди. У кетма-кет учинчи ғалабасини тантана қилди. Бу сафар Уокер 54 сонияда америкалик Кеннеди Нзечуквуни нокаутга учратди. Жонни Уокернинг укаси бўлган Вальтер жангдан кейин рус тилида мураббийлари, оиласи ва рус миллатига мансуб рафиқасини табриклади. 

"Мен Россияни яхши кўраман! Россия – менинг уйим!", – деди Уокер.

Шунингдек, турнирнинг илк жангида ажойиб ғалабани қўлга киритган Фатима Клайн ҳам бонусга лойиқ кўрилди. Фатима иккинчи раундда Мелисса Мартинезни техник нокаутга учратди.