UFC on ESPN 71. Нил Мэгни иштирокидаги жангни рефери тўхтатди

Айрим манбаларда ушбу турнир UFC Vegas 108 номи билан берилмоқда. Ҳар икки ҳолатда ҳам бу тўғри. Бироз аввал оқшом доирасидаги яна бир қизиқарли жанг якунига етди. Икки 38 ёшли фахрий аралаш яккакураш усталари - америкалик Нил Мэгни бразилиялик Элизеу Залески Дос Сантосга қарши октагонга чиқди. 

Иккинчи раунд якунланишига 21 сония қолган бир пайтда Мэгни рақибини партер ҳолатига туширди ва жавобсиз зарбалар йўллай бошлади. Бу ҳолатда рефери жангни тўхтатишга мажбур бўлди. Айнан бугун 38 ёшга тўлган Нил ғалабаси билан ўз туғилган кунига совға ҳозирлади.    

Жангдан кейинги интервьюда у агар мағлубиятга учраганида, UFC`дан ҳайдалиши юз фоиз эканини таъкидлади. Нил бундан аввалги иккита жангида рақиларига имкониятни бой берганди. Унинг ҳисобида 30 ғалаба ва 13 мағлубият бор. Дос Сантос эса бугун кетма-кет иккинчи мағлубиятни қабул қилиб олди. Ҳисобидаги ғалабалари 25 талигича қолди, мағлубиятлари эса 10 тага етди.