UFC рейтинги янгиланди: Гарсия Топ-10, Дюмонт Топ-3`да

Оқшомнинг марказий жангида ҳамюрти Дэвид Онамани биринчи раунддаёқ техник нокаутга учратган америкалик ярим енгил вазн тоифаси вакили Стив Гарсия дивизион рейтингида тўрт поғона юқорилади. У 12-поғонадан 8-ўринга кўтарилиб олди. Унинг рақиби эса ўн учинчи ўриндан ўн тўртинчи ўринга тушди. Дэн Иге эса айнан 13-ўринга жойлашди. Ушбу вазн чемпиони австралиялик Александр Волкановски бўлиб турибди. Россиялик Мовсар Евлов рейтинг пешқадами бўлса, Диего Лопес ва Яир Родригес кучли учликка якун ясаган.  

Турнир доирасида Кетлин Виейра устидан ҳакамларнинг айри қарори билан ғалаба қозонган бразилиялик Норма Дюмонт ватандошини энг енгил дивизион рейтингида учинчи ўриндан тушириб, ўзи Топ-3`таликка кириб олди. У шунингдек, вазн тоифасидан қатъи назар ташкилотнинг аёллар ўртасидаги P4P рейтингида ўн бешинчи ўринда қайд этилди.

Турнирнинг co-main event, яъни муҳимлиги жиҳатидан иккинчи, интригага тўла жангида Анте Делияни биринчи раунддаёқ нокаутга учратган доминиканлик Вальдо Кортес-Акоста оғир вазн тоифаси рейтингида олтинчи ўринда қолди. Ушбу қарама-қаршиликда ғалабасини ўғирлаб кетишганига ишонган ва бошқаларни ҳам ишонтиришга уринаётган хорватиялик эса дивизионнинг тўққизинчи поғонасида қолди.

Шунингдек, энг енгил вазн тоифаси рейтингида америкалик Татьяна Суарес бир поғона юқорилаб, Хитой шарафини ҳимоя қилаётган собиқ дивизион чемпиони Вейли Чжан билан биринчи ўринни бўлишиб турибди.