UFC шарҳловчиси Жо Роган янги шартнома бўйича чорак миллиард доллар олади

Компания стриминг хизмати билан ҳамкорликни давом эттиргани учун Роганга 250 миллион доллар тўлайди. Роган 2024 йилда имзоланган аввалги келишув бўйича ҳам шунча миқдорда маблағ олган эди, бироқ бу сафар у ўз контентини тарқатиш имкониятларини сезиларли даражада кенгайтирди. 

Янги келишув унга машҳур "The Joe Rogan Experience" подкастини Apple Podcasts, Amazon Music, YouTube ва бошқа стриминг хизматларида чиқариш имконини беради.

2009 йилда ишга туширилган Жо Роган подкасти унинг ўзига хос провокацион ҳазилларини намойиш этиши ва турли мавзуларни муҳокама қилиши учун майдонга айланди. Унинг шоусига кўнгилочар индустрия, сиёсат, фан ва спорт вакиллари мунтазам равишда меҳмон бўлишади. 

Шу билан бирга, Роган фитна назариялари ва нотўғри маълумотларни тарқатгани учун бир неча бор танқид қилинган, бироқ бу унинг шоуси дунёдаги энг оммабоп ва кўп эшитиладиган подкастлардан бири бўлиб қолишига тўсқинлик қилмаяпти.

Стендап-комик сифатида ҳам танилган 59 ёшли америкалик UFC билан 1997 йилда ҳамкорликни бошлаган. Дастлаб у саҳна ортида интервью олувчи бўлиб ишлаган, 2001 йилда эса, ташкилотга Дана Уайт раҳбарлик қила бошлагач, Роган асосий шарҳловчилар столига ўтирган ва у ерда чорак асрдан буён фаолият юритиб келмоқда. 

Таъкидлаш жоизки, Жо Роган фақат лига ойига ўртача бир марта ўтказадиган рақамли турнирларда ишлайди ва ҳар бир шоу учун тахминан 50 минг доллар гонорар олади.