UFC Vegas 89. Оқшомнинг марказий жанги ғолибини ҳакамлар аниқлаб беришди

Оқшомнинг марказий жанги тўлиқ беш раунд давом этди. Аёллар ўртасида минимал вазн тоифасида кечган ушбу жангда бразилиялик Аманда Рибас (12-5-0) америкалик собиқ UFC чемпиони Роуз Намаюнас (15-6-0)га қарши октагонга чиқди.

Беш раундлик жанг якунида 31 ёшли Намаюнас ҳакамларнинг якдил қарори билан ғалаба қозонди. У ўзининг бундан аввалги жангини 2023 йилнинг сентябрь ойида Манон Фьёрога қарши ўтказиб, очколар ҳисобига кўра мағлуб бўлган эди. Аманда Рибас эса 2023 йил ноябрь ойида Луана Пинҳеирони таслим этганди. 

"Рақибам ўзини яхши томондан кўрсата олди. Унинг чап оёғи анча кучли эди. Лекин тажрибам эвазига бугун ғалаба қозондим. Энди Манон Фьёронинг жангини кузатаман. Кейинги жангимни айнан унга қарши ўтказишни истайман. Мағлубият учун реванш олишим лозим", - деди Роуз бугунги жангидан кейин октагоннинг ўзида берган интервьюсида.