UFC`даги ўзбек жангчилари сони биттага камайди

Хабарингиз бор, виза билан боғлиқ муаммо сабаб Кауе Фернандес (9-2) Жэрад Гордон (20-7, 1 NC)га қарши жангдан ечилган ва унинг ўрнига промоушен матчмейкерлари UFC дебютанти, ҳамюртимиз Машрабжон Рўзибоев (19-4-1)га имконият тақдим этганди. Аммо жангга уч кун қолганда таклифга рози бўлган аралаш яккакураш устамиз тарозида белгиланган вазн меъёрини қила олмаганди.  

Афсуски, UFC Машрабжон Рўзибоевга иккинчи имкониятни ҳозирча бермасликка қарори қилди ва уни ташкилот ростеридан чиқарди. Ҳеч қандай тайёргарликсиз спортчига уч кун қолганда жанг бериб, вазн қила олмаса, шартномани бекор қилиш жуда ғалати ҳолат. Промоушенда нафақат вазн қила олмай, балки кетма-кет мағлубиятли сериялар билан уришиб юрганлар қанча.  

Маълумот учун, 28 ёшли Машрабжон Рўзибоев Нурсултон Рўзибоев (3-1, UFC)нинг укаси ҳисобланади. 2019 йилда у Naiza промоушенида битта, 2021 йилда Octagon лигасида ҳам битта жанг ўтказди. Айни пайтда 7 та ғалабали серия билан келмоқда.