UFC’нинг енгил вазн тоифаси тарихидаги энг “буюк” жангчи ким?

Ўтган ҳафта Чарльз Оливейра Ислам Махачевга қарши чемпионлик жанги учун потенциал рақиб сифатида баҳоланган Бенил Дариушни таслим этганди. Шундан сўнг UFC тарихидаги енгил вазн тоифасида энг зўр жангчи ким деган савол яна кун мавзусига айланди. 

“Чарльз Оливейра енгил вазн тоифасидаги энг яхши жангчига айлангани ҳақида гап-сўзлар бошланмоқда. Мен бу фикрларга қўшиламан. Одамлар Хабиб бирор марта ҳам мағлуб бўлмаганлигини айтишлари мумкин, бироқ Оливейра кўплаб жиҳатларда устун. Масалан, ҳимоя, ҳужум ва бонуслар. У албатта, олий унвонга даъвогар бўлиши керак. Бундан ташқари Чарльз мағлубиятлардан кейин бир неча маротаба қайта олди. Тез орада Оливейра Махачев билан яна жанг қилади”, деди Алжаймен Стерлинг. 

“Оливейрани тарихдаги энг яхши жангчилардан дейиш мумкинми? Менимча, ҳа. Рақамлар ёлғон гапирмайди. Рақиблар билан муомала қилиш услубига қараганда ва унинг яна чемпионликка даъвогар эканлигини инобатга олсак, энг яхши енгил вазн спортчиси бу – Чарльз Оливейра. Лекин Исламни ҳам унутмаслик лозим. Агар у яна Чарльзни таслим этиб, 6 ёки 7 марта чемпионлик камарини ҳимоя қилса, сўзсиз унга буюклик мақоми берилиши керак”, дейди Генри Сехудо. 

“Чарльз ажойиб жангчи, аммо сиз 9 та мағлубият билан энг зўри бўла олмайсиз. Айниқса, Хабиб каби мағлуб бўлмаган ва ҳеч қандай жароҳат олмаган жангчи билан бир вазнда бўлсангиз”, дея ўз фикрларини билдирган таниқли менежер Али Абдулазиз. 

Умуман олганда, у ёки бу спортчига “энг буюк спортчи” мақомини бериш ўта субъектив нарса, сабаби буюкликнинг аниқ мезонлари йўқ. Хабиб Нурмагомедов учта энг юқори поғонадан муваффақиятли ўтиб, умуман мағлуб бўлмади. Хўш, уни “буюк” деб аташ мумкинми?! Ҳа, лекин UFC’да 13 та жанг ўтказиш бу етарли натижа эмас, дейдиганлар ҳам бор. Дастин Порье ва Жастин Гэтжи ундан кўпроқ жанг ўтказган, балки уларни “буюк” деб аташ керакдир. Шошманг, бу икки жангчини ҳам Оливейра муддатидан аввал “ер тишлатган”, шунда Чарльз ”буюк”ми? Шу билан бирга унинг ўзи 9 маротаба мағлубият аламини татиб кўрган, бу натижа “буюклик”ка даъво қиладиганлар учун жуда кўп кўрсаткич.

Оливейранинг хизматларини эътиборсиз қолдирмаслик лозим. У ажойиб жангчи нафақат октагонда, балки кўплаб рекламаларнинг асосий “юзи” ҳисобланади. Бразилиялик жангчи UFC’да кўплаб рекордлар ва бонуслар бўйича етакчи. Бироқ айни дам Оливейрага муносиб қаршилик кўрсата оладиган жангчилар борлигида уни “буюк” дейиш қанчалик тўғри? 

Чарльз тарихдаги энг яхши жангчилар рейтинги тузилганида балки учликка кирар, лекин етакчи бўла олмайди. Унинг карьерасида етарлича бўшлиқлар бор. Хулоса қиладиган бўлсак, Хабибда бўшлиқлар деярли топилмайди. Махачевни ҳам ёддан чиқармаслик шарт. Тўғри, уни ҳали энг “буюклар” рўйхатига киритишга эрта, аммо у бу унвонга тобора яқинлашиб келмоқда...