Украина россиялик боксчиларнинг халқаро турнирларга қайтишига кескин қарши чиқди

"Украина бокс федерацияси World Boxing қарорини қатъиян қўллаб-қувватламайди. Расмий норозилик аллақачон юборилган. Биз бундан буён ҳам Украина боксининг манфаатларини ва халқаро спортнинг фундаментал қадриятларини изчил ҳимоя қилишда давом этамиз", — дейилади ташкилотнинг расмий баёнотида.

Эслатиб ўтамиз, 29 апрель куни Халқаро бокс федерацияси (World Boxing) россиялик ва беларуслик спортчиларга барча ёш тоифаларидаги бокс турнирларида иштирок этишга рухсат берди, бироқ фақат нейтрал мақом шарти билан. Бунда ҳар бир боксчи мустақил тузилма томонидан текширувдан ўтиши керак, ушбу жараён билан боғлиқ барча харажатлар эса Россия ва Беларусь миллий федерациялари ҳисобидан қопланади.