Улар ЖЧга борадилар №2: Жасурбек Латипов

1991 йилда туғилган Жасурбек учун ушбу жаҳон чемпионати биринчиси эмас. Енгил вазнли тезкор боксчи ҳисобланадиган Жасурбек бунгача икки маротаба жаҳон биринчилигида иштирок этган.

2011 йилда Бокуда бўлиб ўтган жаҳон чемпионатида бронза медалини қўлга киритган Андижон бокс мактаби тарбияланувчиси орадан икки йил ўтиб Алматида бўлган дунё биринчилигида финалгача етиб борган ва ўшанда Миша Алоянга имкониятни бой бериб қўйганди. Орада 2012 йил Лондонда бўлиб ўтган Олимпиадада чорак финалгача етиб бориб, моғулистонлик рақибга ютқазиб қўйганди.

Шундан сўнг ушбу вазн тоифасида терма жамоа йиғинларига Шаҳобиддин Зоиров жалб этила бошланди. Икки йил олдин Дохада бўлиб ўтган жаҳон чемпионатида Шаҳобиддин илк жангидаёқ имкониятни бой бериб қўйганди. Рио Олимпиадасида эса Зоиров олтин медални қўлга киритгани ҳали ёдингиздан чиқмаган бўлса керак.

Ушбу вазн тоифасида Жазоир вакили Муҳаммад Флисси, кубалик Йосбани Вейтиа, қолаверса, ирландиялик Брендан Ирвайн, мезбон боксчи Хамза Тоуба ва қозоғистонлик Азамат Иссакулов Жасурбекнинг асосий рақиби ҳисобланади. Ўз ўрнида шуни таъкидлаб ўтишимиз лозимки, Латипов Гаванада "WSB" жанглари доирасида "Uzbek Tigers" сафида Йосбани Вейтиага мағлуб бўлганди.

Шунингдек, Тошкентда бўлиб ўтган Осиё чемпионатида у Азамат Иссакуловни ярим финалда мағлубиятга учратди. Демак, Иссакулов ўша мағлубият учун қасос олишга ҳаракат қилиши аниқ.

Жасурбек Гамбург турнирига йўлланмани Тошкентда бўлиб ўтган Осиё чемпионатида қўлга киритган. Вакилимиз ўша турнирда барча рақибларини мағлубиятга учратиб, олтин медални Ўзбекистон терма жамоаси ҳисобига қўшиб қўйганди.

Нисбатан совуққон ва оғир босиқ Жасурбек учун ушбу ЖЧ учинчиси ҳисобланади. Биринчи ва иккинчи жаҳон чемпионатларида мос равишда бронза ва кумуш медалларни қўлга киритган спортчимиз учинчи уринишда навбат қайси медалга келганини яхшигина тушуниб турибди. Аммо, бу осон иш эмас. Латипов ушбу жаҳон чемпионатида камида ярим финалгача етиб бора олиши керак.

Азиз Тўхтамуродов