Улар Олимпиадага боришади – Шаҳрам Ғиёсов!

Бугунги қаҳрамонимиз бокс бўйича мамлакатимиз терма жамоаси аъзоси, халқаро тоифадаги спорт устаси Шаҳрам Ғиёсов.

Шаҳрам Ғиёсов – 1993 йилнинг 7 июль куни Бухоро шаҳрида дунёга келган. 10 ёшидан бокс билан шуғулланишни бошлаган. 2003 йили Бухоро шаҳридаги Болалар ва ўсмирлар спорт мактабининг бокс бўлимига қабул қилинган. Илк мураббийи Олим Муҳаммедов. Бу мутахассис икки карра жаҳон чемпиони Аббос Атоевнинг мураббийи ҳам ҳисобланади. Маълумот учун, Атоев боксчилик фаолиятини якунлаб, бугунги кунда Бухорода мураббийлик фаолиятини олиб боряпти.

Шаҳрам Ғиёсов беш йилдан бери мураббий Равшан Хўжаев қўл остида машғулотларни ўтказиб келяпти. Ўсмирлар ва ёшлар иштирокидаги мусобақаларда айтишга арзигулик ютуқларни қўлга киритган Шаҳрам 2012 йилдан катталар ўртасидаги турнирларда қатнашиб келяпти. Айнан ўша йили илк маротаба халқаро турнирда иштирок этди. Симферополь шаҳрида ўтказилган халқаро мусобақада саҳифамиз қаҳрамони чемпионлик шохсупасига кўтарилди. Энг муҳими, у ушбу халқаро турнирнинг энг яхши боксчиси деб топилди.

Шаҳрам Ғиёсов 2015 йилдан ўзи учун янги вазн тоифасига ўтди. Бунга қадар 64 кг вазн тоифасида рингга кўтарилиб келган бухоролик боксчи энди 69 кг вазнда ўз имкониятини синаб кўришга аҳд қилди. Бу эса унга омад келтирди. Мамлакат чемпионатида барча рақибларини мағлубиятга учратиб, олтин медални қўлга киритди. Бу билан у катталар терма жамоасига қабул қилинди ва энг муҳими мураббийларнинг ишончини оқлади.

Шаҳрам Ғиёсов Рио Олимпиадасига йўлланмани шу йили Хитойда ўтказилган лицензион Осиё-Океания чемпионатида қўлга киритди. -69 кг вазн тоифасида рингга кўтарилган боксчимиз барча рақибларини мағлубиятга учратишга муваффақ бўлди. У финал жангида таиландлик боксчи Сайлом Ардини таслим этиб, тўрт йилликнинг энг нуфузли мусобақасига йўлланмани нақд қилди.

- Орзуим – 31-Ёзги олимпия ўйинлари ғолиби бўлиш, - дейди Шаҳрам Ғиёсов.

Биз олимпиадада иштирок этувчи барча спортчиларимиз қатори Бухоро бокс мактаби тарбияланувчиси Шаҳрам Ғиёсовга ҳам чин маънода зафар ёр бўлишини, Бразилиядан ёруғ юз билан қайтиб келишини тилаймиз.