Улар Олимпиадага боришади – Ёдгорой Мирзаева!

Бугунги қаҳрамонимиз бокс бўйича мамлакатимиз терма жамоаси аъзоси, халқаро тоифадаги спорт устаси, ўзбек бокси тарихида илк бор Олимпиадада иштирок этадиган вакиламиз Ёдгорой Мирзаева.

Ёдгорой Мирзаева – 1996 йили Самарқанд вилоятининг Каттақўрғон туманида дунёга келган. Боксдаги илк мураббийи Ойбек Тожиев. Спорт турига қизиқиш уни Самарқанд олимпия захиралари коллежига етаклаб келди. У ерда тажрибали мураббий Шариф Нарзиқулов қўл остида шуғулланишни давом эттирди. Айни пайтда Алишер Навоий номли Самарқанд Давлат университетининг жисмоний маданият факультетининг биринчи босқич талабаси. Ушбу спорт тури билан шуғуллана бошлаганига ҳали кўп вақт бўлмасада, қаҳрамонимиз айтишга арзигулик ютуқларга эришди.

Айнан у ўзбек бокси тарихида Олимпия ўйинларининг бокс баҳсларида иштирок этувчи биринчи аёл спортчига айланди. Ёдгорой ушбу тарихий йўлланмани шу йили Хитойнинг Куинан шаҳрида ўтган Осиё-Океания минтақаси саралаш баҳсларида қўлга киритди. Бугунги кунда у терма жамоа мураббийи Раҳматжон Рўзиохунов қўл остида Чорвоқ спорт базасида тўрт йилликнинг энг нуфузли мусобақасига тайёргарлик кўрмоқда. Машғулотлар кунига икки маҳалдан олиб бориляпти. У ерда асосан умум жисмоний тайёргарликка эътибор қаратилган. Тайёргарлик кун тартибидан кучга ишлаш, жисмоний машқлар, 10 км югуриш, юқорига чопиш, кунора 500, 1000 метрга сузиш каби машғулотлар ўрин олган. Ёдгоройга терма жамоа аъзоларидан бири Турсуной Раҳимова, мураббийлардан Камолиддин Муталов, Дилмурод Ҳасанов яқиндан ёрдам беришяпти.

Орзуим – 31-Ёзги олимпия ўйинларида муносиб тарзда иштирок этиб, ўзимдан ёрқин таассурот қолдиришдир, - дейди боксчимиз. Биз олимпиадада иштирок этувчи барча спортчиларимиз қатори Самарқанд бокс мактаби тарбияланувчиси Ёдгорой Мирзаевага ҳам чин маънода зафар ёр бўлишини, Бразилиядан ёруғ юз билан қайтиб келишини тилаймиз.