Умар Нурмагомедов жанги бекор бўлганини маълум қилди

Бу ҳақда россиялик аралаш яккакураш устасининг ўзи хабар берди. Умар 14 декабрь куни АҚШнинг Тампа шаҳрида ташкил этиладиган UFC on ESPN 63 турнири доирасида хитойлик Сонг Ядонгга қарши октагонга чиқиши керак эди. 

Жанги бекор бўлганини билган Нурмагомедов ижтимоий тармоқдаги саҳифсида дивизионнинг амалдаги чемпиони Мераб Двалишвилига мурожаат қилди. Аввалроқ, Умар грузиялик Мерабни жангдан қочишда айблаганди.   

"Мен жангга тайёрман. Ҳозир янги рақиб беришларини кутяпман. Ядонг жароҳат олиб, декабрь ойидаги жангимизда октагонга чиқа олмаслигини айтишди. Мераб, Сэндхаген билан жангим олдидан сен "ғалаба қозонганинг тақдирингда чемпионлик жангига лойиқ бўласан" деб айтгандинг. Энди эса сен ўз позициянгни ўзгартирдинг. Мутахассислар ҳам, мухлислар ҳам сени мендан қочаётганингни айтяпти. Чемпионлик – бу тан олиш, сен эса уни қўлга киритмадинг. Буни ўзинг ҳам жуда яхши биласан. Мен ҳеч кимни кутмайман. Рамазонгача жанг ўтказишим керак. Умид қиламан, UFC менга рақиб топиб беради. Чемпионлик камари – бу вақт саволи", - деди Нурмагомедов.