Умар Нурмагомедов рақамланган турнирда жанг қилади

Кичик Нурмагомедов 25 октябрь куни БАА пойтахти Абу-Даби шаҳрида ўтказиладиган рақамланган UFC 321 турнирида октагонга чиқади. Бу ҳақда дивизион рейтингида иккинчи ўринни эгаллаб турган Умарнинг ўзи Каспийскда ўтган матбуот анжуманида хабар берган. 

"Ҳа, бу тўғри маълумот. Менежерим менга қўнғироқ қилиб, UFC раҳбарлари Абу-Дабида жанг қилишимни истаётганини айтди. Биз жамоамиз билан келишиб, бу таклифга розилик бердик. Боиси, ўша пайтда бутун жамоамиз Дубайда бўлади. Локация қулай ва мен Абу-Дабида жанг қиламан. Аслида мен беш раундлик турнирнинг асосий жангида октагонга чиқишни режалаштираётгандим. UFC`дагилар шуни исташаётган экан, майли бу чорловни қабул қилдим", – деди Нурмагомедов.

Шунингдек, Умар Абу-Дабида ғалаба қозонган тақдирда яна чемпионлик жанги учун имконият берилишини ҳам қўшимча қилди. 

"Ҳаммаси яна UFC`га боғлиқ. Бир ўзим ҳеч нарсани ҳал қила олмайман. Даъвогарлар орасида ғалабали серия билан келаётган Пётр Ян ҳам бор. Менимча, UFC айнан Янга чемпионлик имкониятини тақдим этади. Кейин менинг Абу-Дабида қандай натижа кўрсатишимга ҳам кўп нарса боғлиқ. Агар ёрқин жанг кўрсатиб ғалаба қозонсам, мени камар учун даъвогар деб эълон қилишлари ҳам мумкин. Мен бунга тайёрман", – деди Умар Нурмагомедов.

Умар Нурмагомедов Абу-Дабидаги турнирда кимга қарши жанг ўтказишини очиқламади. Катта эҳтимол билан унинг рақиби дивизион рейтингида саккизинчи ўринни эгаллаб турган америкалик Марио Баутиста бўлади.