Умид Аҳмаджонов бошчилигидаги делегация Нукус шаҳрига етиб борди, эртага катта спорт фестивали бўлиб ўтади

Ушбу фестивал доирасида турли спорт тадбирлари ташкил қилиниши, шунингдек, мактабгача таълим муассасалари ва меҳрибонлик уйи тарбияланувчиларига президент совғаси тақдим этилиши кўзда тутилган. Асосий тантаналар шаҳар марказидаги "Турон" стадионида бўлиб ўтади.
Соат 19:00да бошланадиган тадбирда эстрада хонандалари ўз чиқишлари билан йиғилганларга юқори кайфият тақдим этадилар. Шунингдек, спортчи ва машҳур қўшиқчилар мактабгача таълим муассасаси ва меҳрибонлик уйи тарбияланувчиларига, футбол фестивали, велопойга ва марафон иштирокчиларига президент совғаларини улашадилар. Соат 20:00дан сўнг Азамат Абдураимов бошчилигидаги Ўзбекистон ўсмирлар терма жамоаси Қорақалпоғистон ва Хоразм вилояти футболчиларидан ташкил топган футболчиларга қарши кураш олиб боради.

Ушбу спорт байрамида иштирок этиш учун ўзбек эстрадасининг таниқли юлдузлари ҳам Нукусга етиб боришган. Бугун делегация аъзолари Ислом Каримов номидаги Тошкент халқаро аэропортидан жўнаб кетишганди. Уларни Нукус аэропортида спорт жамоатчилиги ва миллий либосдаги қизлар кутиб олишди. Тадбирда шунингдек, ўзбек футболи юлдузлари Элдор Шомуродов, Отабек Шукуров, Достон Ҳамдамов ва Жамшид Искандеровлар ҳам иштирок этади. Қолаверса, мураббий Равшан Ҳайдаров ҳам делегация билан бирга Нукусга етиб борган.

Ҳуллас, сизу-бизни олдинда катта спорт байрами кутиб турибди. Воқеалар ривожини Миллий олимпия қўмитаси расмий сайтида кузатиб боринг.