Умид Аҳмаджоновга "Жисмоний тарбия ва спорт аълочиси" кўкрак нишони топширилди

Хабарингиз бор, Ўзбекистон Республикаси Вазирлар Маҳкамасининг 2018 йил 3 майдаги №332 сонли қарорига асосан "Жисмоний тарбия ва спорт аълочиси" кўкрак нишони таъсис этилган.

Бугун Ўзбекистон Республикаси Жисмоний тарбия ва спорт вазири Дилмурод Набиев Миллий олимпия қўмитаси президенти Умид Аҳмаджоновга "Жисмоний тарбия ва спорт аълочиси" кўкрак нишонини топширди.

"Биз ўз йўналишимизда ҳамжиҳатлик билан иш олиб бориб кўплаб муваффақиятларга эришамиз. Олдинда бизни катта чақириқлар ва ислоҳотлар кутиб турибди. Жамиятда Жисмоний тарбия ва спортнинг аҳамиятини кучайтириш, аҳолининг турли қатламлари орасида соғлом турмуш тарзини тарғиб этишда давом этиш, бунинг учун зарур бўлган шароитлар яратиш, машҳур спортчилар сафини кенгайтириш ва янги номларни кашф этиш шулар жумласидандир", - деди Умид Аҳмаджонов.

Маълумот учун, ушбу кўкрак нишони билан Олимпия, Паралимпия ва Осиё ўйинлари ҳамда жаҳон, Осиё чемпионатларида ва бошқа нуфузли халқаро спорт мусобақаларида юксак натижаларга эришган, Ватанимиз байроғини баланд кўтариб келаётган спортчиларнинг тренерлари, жамиятимизда соғлом турмуш тарзини шакллантириш, аҳолининг, айниқса ёш авлоднинг жисмоний тарбия ва оммавий спорт билан мунтазам шуғулланиши учун замон талабларига мос шарт-шароитлар яратиш, жисмоний тарбия ва спортни янада ривожлантиришга йўналтирилган кенг кўламли ишлар амалга оширилишига муносиб ҳисса қўшиб келаётган, шунингдек, мамлакатимизнинг барча ҳудудларида оммавий спортнинг инсон ва жамият ҳаётидаги муҳим аҳамияти, унинг жисмоний ва маънавий соғломликнинг асоси эканини тарғиб қилиш, иқтидорли спортчиларни саралаб олиш ҳамда мақсадли тайёрлаш тизимини такомиллаштириш борасида сидқидилдан меҳнат қилаётган, республикада жисмоний тарбия ва спорт соҳасида малакали кадрлар тайёрлашда жонбозлик кўрсатаётган тажрибали, етук жисмоний тарбия ва спорт соҳаси вакиллари тақдирланадилар.