US Open. Серена Уильямс дунёнинг иккинчи ракеткасини таслим этди

Бугун аёллар ўртасидаги мусобақада кутилмаган натижа қайд этилди. WTA рейтингида 605-поғонадан жой олган америкалик Серена Уильямс иккинчи давра учрашувида дунёнинг иккинчи ракеткаси, эстониялик Анетт Контавейтни мағлуб этишни уддалади - 7/6(4), 2/6, 6/2.

Бу теннисчиларнинг ўзаро ўтказган илк учрашуви эди. Серена 2 соату 29 дақиқа давом этган баҳсда 11 та эйс, 6 та қўшхато ва 5 та брейкни қайд этди. Контавейтнинг бу уч йўналишдаги кўрсаткичлари бир хил 5 тани ташкил қилган. 

Қизиғи, 40 ёшли Уильямс Топ-10 теннисчиларига қарши 250-учрашувини ўтказиб, 178-ғалабасини тантана қилди. Қолаверса, у 40 ёшида Топ-3даги теннисчини мағлуб этган илк ракетка устасига ҳам айланди. Энди у US Open учинчи босқичида австралиялик Айла Томляновичга қарши кортга чиқади. Бу Серена учун 21-АҚШ Очиқ чемпионати ҳисобланади.