Усик фаолиятидаги сўнгги жанг ҳақида: "Бизда иккита вариант бор"

Гап америкалик Деонтей Уайлдер ҳақида бормоқда. Усик айнан шу жанг билан профессионал фаолиятини якунламоқчи.

"Нега энди йўқ? Агар Деонтейнинг жамоаси бу жангни хоҳласа, мен уни ўтказаман. Пул, бизнес... Ҳозир бизда иккита вариант бор ва биз ўзимиз учун энг маъқулини танлаймиз. Жамоам шу устида ишлаяпти", — деди украиналик боксчи "The Athletic" нашрига берган интервьюсида.

Шу билан бирга, Усик ўзининг "сўнгги рақс"ни ўтказиш нияти рингга бошқа ҳеч қачон қайтмаслигини англатмаслигини ҳам таъкидлаб ўтди.

"Тайсон Фьюрини олайлик. У кетади – қайтади. Кетади – қайтади. Биз бу спорт турида жуда кўп вақт ўтказамиз, шунинг учун "мен учун ҳаммаси тугади" деб айтиш жуда қийин. Аммо жуда узоқ вақт ишлаганингизда, танангиз чарчайди. Меники ҳам чарчади. Мен темирдан эмасман, ўзга сайёралик ҳам эмасман. Менинг оилам, ўғил ва қизларим бор", — деб тушунтирди оғир вазн тоифасидаги икки карра мутлақ жаҳон чемпиони.