Усик Жошуа билан реванш жангини қаерда ўтказмоқчилиги маълум

Супероғир вазнда WBA, WBO ва IBF камарлари соҳиби Александр Усикнинг Энтони Жошуа билан реванш жангига ҳам оз вақт қолмоқда.

Жошуанинг промоутери ҳисобланмиш Эдди Хирн украин боксчисининг жамоаси билан бўлиб ўтган музокаралар тафсилотлари билан ўртоқлашди. Хирннинг сўзларига қараганда, Усик реваншни Яқин Шарқ ҳудудида ўтказишни истайди.

"23 июнь санаси аниқ эмас, аммо ўша куни Яқин Шарқда Усик — Жошуа жангини кўришингиз учун яхшигина имкониятимиз бор. Бутун дунё бўйлаб бизда таклифлар бор, уларнинг устида ишлаяпмиз. Бу вариантни танлашга яқинмиз.

Усикнинг жамоаси Яқин Шарқ вариантини афзал кўришларини айтишди, табиийки, у кўп пул ишлаб олмоқчи. Яқин Шарқдаги сумма Британиядагидан қўпроқ бўлишидан ташқари, Усикнинг жамоаси жангни нейтрал ҳудудда ўтказиш ҳақида ўйлаяпти, уларни бу борада айбламайман. Хуллас, мана биз энди қаердамиз".

Хирн Усик — Жошуа жангининг қачон расман эълон қилинишини айтди.

"Жангни шу ҳафтада эълон қиламизми? Тўғрисини айтсам, йўқ. Кейинги ҳафтада эълон қиламизми? Албатта. Бу жангни июль ойида томоша қиласиз, тез орада расман эълон қилинади", - дея Хирннинг сўзларини келтиради Boxingnews24.