Усик ва Фьюри, Канело ва Бетербиев, Ломаченко – Камбосос. 2022 йилнинг энг кутилган 10 та жанги

Профессионал боксдаги 2022 йил MMA'дан фарқли ўлароқ, узоқ давом этадиган хотиржамлик билан бошланади. Биринчи катта жанг февраль ойининг охири - март ойининг бошида бўлиши кутилмоқда. Шунинг учун биз йилнинг энг кутилган ўнта жангини ҳақида гаплашамиз, улар албатта ташкил этилиши керак. Улардан баъзилари аллақачон расман тасдиқланган, бошқаларни ташкил қилиш учун сабр қилишлари керак.

Александр Усик – Энтони Жошуа

Биринчи жанг воқеалари қандай ривожланганлигини ҳисобга олсак, бу йилги энг баҳсли мегажанг.  

Шартнома шундай тузилганки, мағлубиятга учраган тақдирда, Жошуа тез орада реванш олишни талаб қилиши мумкин эди ва жангдан сўнг дарҳол буни эълон қилди. Томонлар апрель ойи учун иккинчи жангни эълон қилиб, музокараларни бошладилар. Аммо бир мунча вақт ўтгач, АJ янги бош мураббий излаётгани, Усик ва Тайсон Фьюри ўртасида мутлақ жаҳон чемпионини аниқлаш учун жанг ташкил этилса, четга чиқишга тайёрлиги, ғолиб боксчига қарши рингга чиқиши ҳақида хабарлар пайдо бўлди. Ҳозирча бу вариант расман эълон қилинмаган, шунинг учун Усик - Жошуа реванш учрашуви бўлиб ўтади, деб 100% ишонч билан айтишимиз мумкин.

Биринчи жангнинг тафсилотларини ҳисобга оладиган бўлсак, британиялик қандай қилиб реванш олиши ва қандай қилиб ўз карьерасини бутунлай барбод бўлишидан қутулиб қолиши мутлақо тушунарсиз. Аммо энди АJ мураббийни алмаштиришдан ташқари машғулотлар тизимини ҳам ўзгартирди, масалан, клинчларда яхшироқ ишлаш учун курашни кучайтира бошлади. Флойд Мейвезер билан ишлаётгани Жошуанинг Усикка қарши реванш жангига қанчалик жиддий тайёргарлик кўраётганидан далолат беради.

Александр Усик – Тайсон Фьюри

Қолган жангларга ҳурмат сақлаган ҳолда, бу тўқнашувни йилнинг энг орзу қилинган жанги дейиш мумкин. Жошуа бу жанг бўлиши учун ўз шартини айтди: мураббийлар штабида ўзгариш қилаётгани учун бу тўқнашувга рози. Буни Усикнинг промоутери Александр Красюк ҳам яширмаяпти:

«Усик-Фьюри тўқнашуви ҳақидаги музокаралар жуда жиддий тусга эга. Фьюри бу кечада жанг қилишни хоҳлайди. Фьюрининг промоутерлари ва менежерлари бу жанг бўлишини исташади. Бу учрашувни Усик, унинг промоутер ва менежерлари хоҳлашади. Энтони Жошуа ҳам ўзининг промоутерлари каби бу жангга қарши эмас.

Жошуа кейинги жангни ғолиб билан ўтказишига кафолат берилсагина четга чиқиб туришга тайёр. Ер сайёрасидаги ҳеч бир инсон Диллиан Уайтнинг даъвоси билан буни кафолатлай олмайди. Шу сабабли, бугунги кундаги энг катта жанг бу Фьюри-Уайт ва Жошуа-Усикнинг реванши деб ҳисоблайман», - деди Красюк.  

Иложи борича ҳаммани, ҳатто нейтрал бокс ишқибозларини ҳам қизиқтирадиган жанг: Усик «Лўлилар қироли»нинг фонида ўрта вазн тоифасидаги боксчига ўхшаб кўринишига қарамай, у даража жиҳатидан Фьюрининг барча рақибларидан анча юқори эканлиги аён. Ҳатто Владимир Кличкодан ҳам.

Роман Гонсалес – Хуан Франциско Эстрада

2021 йилнинг энг ажойиб ва айни пайтда энг баҳсли жангларидан бири. 12 раундда икки боксчи умумий 2529 та зарба бериб, биринчи енгил вазн тоифасида рекорд ўрнатдилар. Ташаббус қўлдан-қўлга ўтди, Гонсалес чемпионлик раундларини ишончли тарзда ўтказди, аммо ҳакамлар ўта баҳсли бўлинган қарор билан ғалабани Эстрадага берди.

Жангдан сўнг боксчилар ушбу қарама-қаршиликда ким кучли эканлигини (биринчи жангда Гонсалес ғалаба қозонган) белгилаши керак бўлган охирги - учинчи жангни ўтказишга тайёр эканликларини билдирдилар. Ва бу жанг аллақачон расман тасдиқланган: 5 март куни Сан-Диегода жуда қизғин баҳс бўлади.

Артур Бетербиев – Дмитрий Бивол

Шубҳасиз, икки россиялик боксчи ўртасидаги энг яхши жанг. Бивол ва Бетербиев бир неча йиллардан буён ўз дивизионида энг яхши деб топилиб, тўртта чемпионлик камаридан учтасига эгалик қилишади. Пандемия иккаласини ҳам бир йилдан кўпроқ ўтказиб юборишга мажбур қилди, бу эса уларнинг карьерасига салбий таъсир кўрсатди: улар Адам Динес ва Крейг Ричардсга қарши фаолиятларидаги энг заиф жангни намойиш қилишди. Ҳозир бу тўқнашувни ўтказиш учун энг идеал жой – Россия. Буни промоутерлар ҳам, боксчилар ҳам хоҳлашади. Музокаралар аллақачон бошланган ва Бивол учрашув май ойида бўлиб ўтиши мумкинлигини тан олди: «Ҳақиқатан ҳам, бу жанг май ойида бўлиши мумкин. Ҳар бир инсонда бу курашни ташкил этиш истаги бор. Мен Артурга доим ҳурмат билан муносабатда бўлганман, уни терма жамоадан буён танийман. Биз у билан яхши муносабатдамиз».

Куч ва тезлик, босим ва техника. Бу услублар жанги ва бу учрашув 2022 йилда бўлиб ўтиши керак.

Василий Ломаченко – Жорж Камбосос

Бир вақтлар дунёнинг энг яхши боксчи бўлган Лома учун Камбосос билан жанг нафақат энг орзу қилинган жанг, балки ҳақиқий жекпот ҳамдир. Аслида, Василий бу жангга тўлиқ муносиб эди, чунки ўтган йили у дивизионнинг энг яхши жангчилари Масайоши Накатани ва Ричард Коммини ишончли тарзда мағлуб этган эди:

«Албатта, мен Камбосос билан жанг қилишга лойиқман деб ўйлайман. Менга бу имконият керак. Агар менга бундай имконият берилса, мен ундан фойдаланаман. Жанг қаерда бўлмасин, ўша ерга бораман. Менинг мақсадим - енгил вазн тоифасида мутлақ жаҳон чемпиони бўлиш. Мен бу дивизионда қоламан ва менга тўртта камар керак». Ва ҳаммаси яхши бўлиши мумкин. Лекин бир нарса бор: Теофимо Лопесга қарши шов-шувли жангдан сўнг Камбосос шунчаки катта чекни эмас, балки қаршилигидан ўтиши осон бўлган рақибни хоҳлайди. Дэвин Хэйни ёки Райан Гарсия унга Ломадан кўра яхшироқ кўринади, Василий билан миллионларни ололмайди ва ютқазиш эҳтимоли жуда юқори. Украиналикнинг промоутери Боб Арум жангни ташкил этиш учун барча усулларни ишга сола бошлади. Василий WВО рейтингида биринчи ўринни эгаллаб турибди, шунинг учун у Камбососдан ё жанг қилишини ёки чемпионлик камаридан воз кечишни талаб қилишга ҳақли. Ҳозирча, бир сўз билан айтганда, Жорж Ломаченко билан жангга қарши эмас, амалда қандай бўлишини - вақт кўрсатади. Бу тўқнашув нафақат Украинада, балки бутун дунёда катта қизиқиш уйғотишига шубҳа йўқ.

Теофимо Лопес - Жош Тейлор

Лопес сўнгги жангда сенсацион тарзда Жорж Камбоссосга ютқазди, аммо кейинги жангда у ярим ўрта вазнда Жош Тейлорга қарши мутлақ жаҳон чемпионлиги учун баҳс олиб бориши мумкин. Теофимо узоқ вақтдан бери дивизиондаги пойгачи билан муаммоларга дуч келди, шунинг учун биринчи ярим вазн тоифасига ўтиш мантиқан тўғри қарорга ўхшайди. Тейлор барча чемпионлик камарларини йиғиб, шунчаки дивизионни тозалади. Жош Буюк Британияда ҳам унчалик машхур бўлмаган Жек Каттералга қарши камарларнинг навбатдаги ҳимоясини ўтказса, нима ҳам дейиш мумкин. Бундай жанг ҳамма учун фойдалидир: Лопес яна чўққига қайтиши мумкин, Тейлор ниҳоят ҳақиқатан ҳам катта номга эга бўлади, шунингдек, иккала жангчи ҳам энг тажовузкор услубда бокс ўтказади. Лопес бу жангга шунчалик ишонадики, у бу жанг учун ҳамма иш бажарилган деб ҳисоблайди: «Мен яна мутлақ жаҳон чемпиони бўламан, лекин биринчи ярим ўрта вазн тоифасида». Боксчиларнинг промоутери битта эканлигини инобатга олсак, Теофимонинг ишончини тушуниш мумкин.

Сауль Альварес – Артур Бетербиев

Миллионлар орзусидаги жанг. Бир йил ичида супер ўрта вазн тоифасини забт этганидан сўнг, мухлислар замонамизнинг энг яхши боксчиси худди шу нарсани энг рақобатдош вазнлардан бирида такрорлашини кутишган, бу ерда рақиблар Калеб Плант ёки Билли Жо Сондeрсдан жиддийроқ. Аммо Альварес энг мунозарали вариантни танлади – биринчи оғир вазнда ўз омадини синаб кўриш, рақиб сифатида олдинги рақиблари фонида жуда кучли бўлган Илунга Макабуни танлади.

Тарихни қайта ёзишдан чарчамайдиган мексикаликни тушуниш мумкин. Бироқ ҳозир боксдаги асосий нокаутчига қарши кураш бутунлай бошқа савия. Головкинга билан тўқнашувдан кейин Канело учун биринчи жиддий синов. Бетербиевнинг промоутери Боб Арумнинг фикрича, гап Сауль Артурнинг қаршилигидан ўта олишига ишончи комил эмаслигидандир: «Агар Канелонинг устози Эдди Рейносо Альваресда Бетербиевни мағлуб этиш қобилияти бор деб ҳисобласа, уларни рингда кўришимиз учун имконият бор. Агар Рейносо жангни маъқулламаса, у Саульни бу боксчига ютқазиши мумкин, деб ўйлайди. Биз ҳаммамиз биламизки, Бетербиев хавфли панчер, шунинг учун уларнинг жанги эҳтимолдан йироқ эмас».

Аммо Бетербиевнинг ўзи Арумдан бутунлай бошқача маълумотларга эга: 

«Промоутерим Боб Арум, Маркус Браун билан жангдан бир ярим ой ёки бир ой олдин боғланганимизда, у Канело билан гаплашгани, бу жангга қизиқаётганини ва мен билан бокс тушишни истаётганини айтди. Улар томонидан ҳам, бизникида ҳам ҳеч қандай аниқ таклифлар йўқ эди. Менимча, Боб Арум бу жанг бўлиши мумкинлигига ишонади». 

Бироқ Альвареснинг ярим оғир вазн тоифасига ўтиб, дивизионнинг энг яхши боксчисига қарши курашиш эҳтимоли туфайли бундай ажойиб жанг ўтказилмаслиги мумкин.

Эррол Спенс – Теренс Кроуфорд  

Ушбу жанг ҳозирги рўйхатдаги учрашувларнинг энг узоқ кутилгани. Нега ҳалигача бу амалга ошмагани тушунарсиз. Спенс ва Кроуфорд нафақат яримўрта вазннинг, балки дунёдаги энг яхши боксчиларнинг юқори поғонасидадир. Бир сўз билан айтганда, Эррол ва Теренс энг яхшиларни аниқламоқчи, улар ижтимоий тармоқларда фаол курашмоқдалар, лекин ҳали ҳам бунга эриша олишмаяпти. Кроуфорд истеъфодаги чемпионларни мағлуб этишда давом этмоқда ва Спенс 2020 йил декабридан бери рингга чиқмади. У баҳорда Мэнни Пакьяони нафақага кузатиб қўйган WBА чемпиони Йорденис Угас билан жанг қилади. Агар Спенс ғалаба қозонса, у ҳолда Кроуфорд билан жанг ярим ўрта вазн тоифасида мутлақ чемпионлик мақоми учун бўлади. Иккала боксчи учун ҳам бундан ортиқ мотивация бўлиши мумкин эмас ва промоутерлар, ТВ тармоқлари бундай курашни ҳақиқатга айлантириш учун кучларини бирлаштириши керак. Бу достон бўлишига шубҳа йўқ.

Геннадий Головкин – Жермалл Чарло

Қозоғистонлик боксчи фаолиятидаги илк мағлубиятини Канело билан реванш жангида қабул қилиб олган 2018 йилнинг кузидан бери ҳеч қандай жиддий жанг ўтказмаган. 8 апрель куни Геннадий аллақачон қирқ ёшга киради. Головкиннинг фаолияти тугашига камида бир-икки йил бор ва қозоғистонликнинг энг яхши йиллари аллақачон ортда қолгани аниқ. Декабрь ойида у WВА йўналиши бўйича ўрта вазн тоифаси чемпиони Рёто Муратага қарши жанг ўтказиши керак эди, бироқ коронавируснинг янги штамми туфайли жанг баҳорга қолдирилди. GGG ҳатто карьерасининг охирида ҳам айрим японияликлардан ўтиб кета олади, аммо бу ўрта вазннинг бир вақтлардаги асосий панчерига катта устунлик бериши даргумон. Головкин учун идеал тоқнашув WBC чемпиони Жермалл Чарлога қарши бўлиб, у бир неча йиллардан буён номдор рақиблар билан рингга чиқишга ҳаракат қилмоқда.

Канелонинг оғир вазн тоифасига ўтиши (ҳар қандай Топ боксчи билан жанг)

Агар Сауль Альварес биринчи оғир вазнда чемпионликни қўлга киритишга қарор қилган бўлса, унда уни оғир вазн тоифасига ўтиш саргузаштидан нима тўхтата олади? Бир қарашда, фаолиятини ярим ўрта вазнда бошланган боксчининг оғир вазн тоифасига чиқиши илмий фантастикадек туюлади. Бу Мэнни Пакьяонинг вазн тоифаларидаги саёҳатидан ҳам яхшироқ. Канело учун бу фонда чемпион билан жанг қилиш унчалик муҳим эмас, шунчаки қироллик дивизионининг топ боксчиси билан жанг қилишнинг ўзи кифоя – агар у бу ишни уддаласа, боксда янги эпоха бошланади. Чемпион бўлса, Альварес нафақат тарихдаги энг буюк мексикалик боксчига айланади, балки Муҳаммад Али билан ёнма-ён туриши мумкин.

Бироқ, юқоридагиларга қараганда бу вариант энг кам эҳтимолга эга. Канелонинг амбицияларини билган ҳолда, агар у буни расман эълон қилса ҳам ажабланмаймиз.

Сарвиноз РАХМОНҚУЛОВА таржимаси.