Усикнинг қачон рингга қайтиши айтилди

Украиналик боксчи келаси йилнинг март ойида рингга қайтишни ва америкалик Деонтей Уайлдер билан жанг ўтказишни режалаштирмоқда. Ҳозирда режа қилинаётган ушбу жанг АҚШда бўлиб ўтиши керак. Бу ҳақда спорт шарҳловчиси Майк Коппингер "Inside The Ring" дастурининг навбатдаги сонида Усикнинг жамоаси директори Сергей Лапинга таяниб хабар берди.

Биргина "The Ring" чемпионлик камари соҳиби бўлиб қолаётган Александр Усик бунгача АҚШда уч марта жанг қилган. Охирги марта бу 2019 йилнинг октябрь ойида содир бўлган, ўшанда Усик Чикагодаги "Wintrust" аренасида Чазз Уизерспунни еттинчи раундда мағлуб этган эди.

Жорий йилнинг май ойида 39 ёшли Усик нидерландиялик Рико Верховен билан бўлган қарама-қаршиликда мағлубиятдан зўрға қутулиб қолди. У Мисрдаги Гиза эҳромлари ёнида ўтган жангнинг ўн биринчи раундида "Glory"нинг собиқ чемпионини баҳсли тарзда тўхтатди ва шундан сўнг ўзига тегишли бўлган IBF, WBA ваa WBC чемпионлик камарларидан воз кечишга қарор қилди.

Супероғир вазн тоифасида WBC йўналиши бўйича собиқ жаҳон чемпиони Деонтей Уайлдер охирги жангини жорий йилнинг апрель ойида ўтказиб, Лондондаги тадбирда британиялик Дерек Чисорани ҳакамларнинг айри қарори билан мағлуб этган эди.