UzChess Cup турнири cтарт олди. Ўзбек дербисида Нодирбек ғолиб, Жавоҳир жаҳон чемпионини мағлуб этди

Иккинчи бор ташкил этилаётган UzChess Cup турнири Masters, Challengers ва Futures гуруҳларида ўтказилмоқда. Кучлилар жам бўлган Masters гуруҳида россиялик жаҳон чемпиони Ян Непомняший, ҳиндистонлик таниқли гроссмейстерлар Аравиндҳ Читамбарам, Рамешбабу Прагнанандҳа, Аржун Эргаиси, эронлик Парҳам Мақсудлу, ўзимизнинг гроссмейстерлар Нодирбек Абдусатторов, Жавоҳир Синдаров, Нодирбек Якуббоев ва Шамсиддин Воҳидов ўзаро баҳс олиб боряпти. 

FIDE Circiut учун қимматли рейтинг очколари ўйналаётган ушбу халқаро турнирнинг 1-турида Нодирбек Абдусатторов оқ доналарда Шамсиддин Воҳидовни мағлубиятга учратди. Жавоҳир Синдаров қора доналарда жаҳон чемпиони Ян Непомняшийни таслим этиб, кичик шов-шув сабабчисига айланди. Нодирбек Якуббоев оқ доналарда Аржун Эргаисига ютқазиб қўйди. Ҳиндистонлик гроссмейстерлар Аравиндҳ Читамбарам ва Рамешбабу Прагнанандҳа партиясида кучлар тенг келди. 

Турнирнинг Challengers гуруҳида иштирок этаётган Гулруҳбегим Тоҳиржонова оқ доналарда Жаҳонгир Воҳидов билан дуранг ўйнади. Гроссмейстеримиз Муҳиддин Мадаминов озарбайжонлик таниқли шахматчи Нижат Абасовни мағлуб этишни уддалади. Ёш шахматчимиз Муҳаммадзоҳид Суяров хитойлик гроссмейстер Ма Кун билан дуранг қайд эта олди. 

Futures гуруҳининг 1-турида ҳам ўзбек дербиси кузатилди. Ҳумоюн Бегмуратов гроссмейстер Ортиқ Ниғматов билан муроса кўчасини танлади. Саидакбар Сайдалиев ҳам илк турда дуранг ўйнади. Гроссмейстерларимиздан бири Абдималик Абдисалимов қора доналарда Роберт Рак билан очколарни бўлишиб олди.