Вадим Немков - Кори Андерсон трилогияси бекор қилинди!

Афсуски, 2025 йилнинг 25 январь куни БААнинг Дубай шаҳрида ўтказилиши белгиланган жанг бекор қилинди. Бу ҳақда америкалик аралаш яккакураш устаси ўзининг ижтимоий тармоқдаги саҳифасида хабар берди. 

"Йигитлар, тезкор хабар – трилогия бўлмайди. Бугун эрталаб мени ана шу совуқ хабар уйғотди. PFL ва Bellator Лигаси раҳбарларидан хабарнома келди: "Вадим сен билан жанг қилишдан бош тортмоқда. Уларнинг айтишича, сен Вадим учун қийин рақиб экансан. У турнир кардида қолмоқчи, лекин сен билан жанг қилиш ниятида эмас. Немков кучсизроқ рақиб олмоқчи". 

Бу ҳолатда сен қандай қилиб ўзингни ташкилотнинг вазн тоифасидан қатъи назар кучли жангчиси деб аташинг мумкин? Бунчалик қўрқоқ бўлма! Мен сенга қарши жангни етти ҳафта олдин беришганига қарамай, қабул қилгандим. Мен тайёрман! Мен ўйиндаман – исталган пайтда ва манзилда сен билан жанг қилишга тайёрман. Сенга қарши жанг шартномасини имзолашим билан Вегасга отлангандим. Ҳозир эса уйга қайтишга тараддуд кўряпман. Жанг бўлмас экан, машғулот ўтказишдан фойда йўқ!", - деди жанги бекор бўлган Андерсон. 

Маълумот учун, ўтган ҳафта PFL ва Bellator промошенлари Кори Андерсонни Вадим Немковнинг жароҳат сабаб сафдан чиққан рақиби Анте Делиюнинг ўрнига тасдиқлашганди. 2022 йилда Вадим Немков икки бор Кори Андерсон билан тўқнаш келганди. Bellator лигасининг яримоғир вазн тоифаси Гран-при финалидаги илк жанг спортчиларнинг бош билан тўқнашиб кетишлари сабаб ўтказилмаган деб топилганди. Иккинчи жангда эса россиялик аралаш яккакураш устаси ҳакамларнинг якдил қарори билан ғолиб бўлган эди.