Вазир спорт таълими ва оммавий спорт тарғиботини янада кучайтиришга қаратилган видеоселектор ўтказди

Унда Вазирлик, Миллий Олимпия қўмитаси ва Миллий Паралимпия қўмитаси раҳбарияти ва ходимлари, Республика Олий спорт маҳорати мактаблари, вилоят ва туманлардаги спорт бошқармаларнинг мутасаддилари, Республикадаги барча БЎСМ ва ИБЎСМ вакиллари иштирок этишди. 

Тадбир давомида кун тартибидан ўрин олган барча масалалар танқидий руҳда кўриб чиқилди. Ўз вазифасига юзаки ёндашаётган мутасаддиларга сўнги огоҳлантириш берилди.

А.Икрамов даставвал Олимпия ва Паралимпия тайёрлаш марказларига қабул жараёнларининг очиқлик ва шаффофлик асосида ўтишини назорат қилиш, методистлар малакасини ошириш масаласига алоҳида тўхталди. Бу борада Хоразм вилоятидаги амалий имтиҳон жараёнларининг YouTube ижтимоий тармоғида жонли бериб борилгани бошқа ҳудудларга мисол тариқасида кўрсатилди. 

Йиғилишда кун тартибига мувофиқ, 2022/2023 ўқув йилидан бошлаб спорт мактаблари фаолиятини янги тизим асосида ташкил этиш бўйича белгиланган вазифалар ижро ҳолати ҳамда спорт мактаблари раҳбар ходимлари ҳамда методистларининг малакаси ва масъулиятини ошириш масалалари, Спорт тадбирларининг 2023 йилга мўлжалланган календарь режасини шакллантириш, йил якунига қадар тизимни молиялаштириш, жумладан ходимларни рағбатлантиришни адолатли ва шаффоф ташкил этиш ҳамда Спортни қўллаб-қувватлаш жамғармаси фаолиятини ташкил этиш масалалари ҳам кўриб чиқилди.

Шунингдек, йиғилишда 5 ташаббус Олимпиадасининг иккинчи босқичини ҳам юқори савияда ташкил этиш, унда аҳоли қамровини кўпайтириш борасида таклифлар ўрганиб чиқилди. Ҳозирда биринчи босқичда ғолиб бўлган маҳаллаларга ворк-оут майдонларини қуриш жараёни олиб борилмоқда. Адҳам Икрамов бу каби бунёдкорлик ишлари мусобақанинг кейинги босқичларида бошқа маҳалла вакилларига ҳам мотивация беришини урғулади. 

Тадбир давомида айрим ҳудудлардаги спорт мактабларининг фаолияти танқидий руҳда кўриб чиқилди. Лавозимига нолойиқ деб топилган мактаб директорлари ва мутахассислар ишдан олиниб, уларнинг ўрнига муносиб номзодларни таклиф қилиш бўйича кўрсатмалар берилди. 

Якунда А.Икрамов барчани кириб келаётган Ўзбекистон Республикаси Мустақиллигининг 31 йиллик байрами билан қутлаб, барча ходимлар, қолаверса тизимнинг қуйи ташкилотлари вакилларига йиғилишда берилган топшириқларни ўз вақтида ва сидқидилдан бажаришни сўради.