Весели Жоковичдан сўнг яна бир номдор ракетка устасига "чиқиш эшиги"ни кўрсатди

ATP рейтингида 123-поғонадан жой олиб турган Иржи Веселининг шов-шувли юриши давом этади. Чорак финалда дунёнинг биринчи ракеткаси Новак Жоковични мағлуб этган чехиялик теннисчи ярим финалда рейтингнинг 14-поғонасидан жой олган канадалик Денис Шаповаловни мағлубиятга учратди. 

Уч соату 16 дақиқа давом этган драматик баҳснинг уччала сети ҳам тай-брекка қадар давом этди. Иржи номдор рақибини 6/7(7), 7/6(2), 7/6(3) ҳисобларида таслим этиб, финалга йўл олди. Бу теннисчиларнинг ўзаро ўтказган илк учрашуви эди. Денис 7 та эйс зарба ва 2 та брейкни амалга ошириб, 12 та қўшхатога йўл қўйди. Весели эса 19 та эйс, 2 та брейк-пойнт қайд этди.