Волейбол бўйича биринчи Марказий Осиё чемпионатида гуруҳ баҳслари якунланди

Хабарингиз бор, айни кунларда Фарғона шаҳридаги «Само» спорт мажмуасида волейбол бўйича эркаклар ва аёллар ўртасида биринчи Марказий Осиё чемпионати ўтказилмоқда. Кеча гуруҳ баҳслари якунига етиб, ярим финалчилар аниқланди.

Эътиборли жиҳати, эркаклар ва аёллар ўртасидаги мусобақаларда ярим финал жуфтликлари бир хил кўриниш олди.

Жумладан, эркаклар ўртасидаги мусобақаларда қўшни Қозоғистон терма жамоаси барча ўйинларни ғалаба билан якунлаб, гуруҳ босқичини 1-ўринда тугатди. Энди улар финал йўлланмаси учун гуруҳ баҳсларини сўнгги поғонада тамомлаган тожикистонликлар билан куч синашади. Иккинчи ярим финал жуфтлигини Ўзбекистон ва Қирғизистон терма жамоалари ташкил этишди.

Худди шундай ҳолат аёллар ўртасида ҳам кузатилди. Яъни, бу ерда ҳам гуруҳ босқичини қозоғистонликлар 1-ўринда тугатишди. Ярим финалда улар гуруҳ аутсайдери Тожикистон билан куч синашса, ҳамюртларимиз қирғизистонлик дугоналари билан мусобақалашади.

Дарвоқе, кеча бўлиб ўтган Ўзбекистон ва Қирғизистон жамоалари учрашувларини томоша қилиш учун Фарғонага Қирғизистон Республикаси Боткен вилояти губернатори А.Алимбаев ташриф буюрди. Фахрий меҳмонни Фарғона вилояти ҳокими ўринбосари, Туризм ва спорт бош бошқармаси бошлиғи Х.Аҳмедов кутиб олди.

Ташриф давомида А.Алимбаев «Само» спорт мажмуасида яратилган шароитларни ҳам кўздан кечирди.

Мусобақа ғолиблари 22 август куни аниқланади.