Волейбол. Илк бор ўтказилган мамлакат чемпионатида андижонлик фахрийлар тенгсиз

Мусобақада 7 та жамоа ғолиблик учун баҳс олиб борди.

“А” гуруҳида Андижон вилояти фахрийлари барча ўйинларда ғалаба қозониб, гуруҳ ғолиби сифатида ярим финалга йўл олган бўлса, Қорақалпоғистон Республикаси фахрийлари икки ғалаба ва бир мағлубият билан иккинчи бўлишди.

“Б” гуруҳида фарғоналиклар юз фоизлик натижа билан 1-ўринни эгаллаган бўлишса, Наманган вилояти фахрийлари бухороликларни мусобақадан чиқариб юборди.

Ярим финалда қуйидаги натижалар қайд этилди:

Андижон – Наманган – 2:1

Қорақалпоғистон Республикаси – Фарғона – 2:0.

Финалда таниш рақиблар тўқнаш келишди. Одатда икки жамоа бир мусобақа давомида икки бор рўбарў келса, кўп ҳолларда гуруҳ босқичида ғолиб бўлган жамоа финалда имкониятни бой бериб қўяди. Аммо, волейбол бўйича фахрийлар ўртасида биринчи Ўзбекистон чемпионатида бундай ҳолат кузатилмади. Андижонлик фахрий волейболчилар иккинчи тўқнашувда ҳам қорақалпоғистонлик рақибларини аяб ўтиришмади: 25:10, 25:11.

Шу тариқа Ўзбекистон чемпионатининг олтин медали Андижон вилояти жамоасига насиб этган бўлса, кумуш медални қорақалпоғистонлик фахрийлар қўлга киритди. Наманган вилояти жамоаси эса бронза медалига сазовор бўлди.