Волейбол: ЎзДЖТСУ қизлари Ўзбекистон кубогини қўлга киритди

Бу йилги мусобақада 11та жамоа икки гуруҳга бўлинган ҳолда ғолиблик учун баҳсларга киришган эди.

Қизғин ва муросасиз кечган баҳслар якунига кўра иккита олийгоҳ талабалари ўз гуруҳларида ғолибликни қўлга киритишди. “А” гуруҳида Ўзбекистон давлат жисмоний тарбия ва спорт университетининг СКУФ жамоаси барча ўйинларда 3-0 ҳисобида ишончли ғалабага эришган бўлса, “Б” гуруҳида Нукус давлат педагогика институти талабалари ҳам барча ўйинларни ўз фойдасига ҳал қилишди. Фақат, улар кутилмаганда гуруҳ аутсайдерларидан бири “Ишонч” (Фарғона) жамоасига қарши ўйинда иккита партияни бой беришди, бироқ якунда барибир 3-2 ҳисобида ғалабани илиб кетишди.

Ўз гуруҳларида 2-ўринни қўлга киритган “Тўмарис” (Наманган) ҳамда “Андижон” жамоалари ўртасида 3-ўрин учун кечган баҳсда наманганлик қизлар 25:20, 25:18 ва 25:15 ҳисобларида имкониятни бой беришди.

Финал ўйинида ҳам йирик ҳисоб қайд этилди: СКУФ қизлари нукуслик дугоналарини 25:21, 25:13 ва 25:17 ҳисобларида ишонч билан мағлуб этишди.

Мусобақа якунида ғолиблар медаль, диплом ва кубок билан тақдирланишди.

Бугун Фарғона шаҳрида эркаклар ўртасида Ўзбекистон кубоги мусобақалари ҳам ўз якунига етади.