Волейболни ривожлантириш бўйича қўшни давлатлар билан ҳамкорлик меморандуми имзоланди

Уларни МОҚ Бош котиби Ойбек Касимов кутиб олди.

Меҳмонлар ушбу ташриф давомида Ўзбекистон Миллий Олимпия қўмитаси ва унинг қошида ташкил этилган Республика спорт тиббиёти илмий-амалий маркази фаолияти билан яқиндан танишдилар. Шундан сўнг томонлар ўртасида келгуси режалар муҳокама қилиб олинди. Мулоқот жараёнида МОҚ раисининг ўринбосари Шерзод Тошматов, Ўзбекистон теннис федерацияси бош котиби Ирода Тўлаганова, Ўзбекистон волейбол федерацияси бош котиби Ҳусан Насруллаев, соҳил волейболи бўйича қозоғистонлик эксперт Дмитрий Воробьёв ҳам иштирок этди.

Кун тартибига мувофиқ, расмийлар «Тошкент-2025» IV ёшлар Осиё ўйинлари, Токио-2020 Олимпия ўйинларига тайёргарлик масалалари бўйича атрофлича фикр-мулоҳазалар билдиришди. Шунингдек, томонлар ўз давлатларида таэквондо, теннис каби спорт турларини янада ривожлантириш борасида ўзаро фикр алмашишди.

Суҳбатда Юнус Попалзай яқинда таэквондо бўйича ташкил этилган халқаро ўқув-машғулот йиғини юқори савияда ўтказилгани учун Ўзбекистон таэквондо ассоциациясига миннатдорлик билдириб, қўшма ҳамкорликни Иорданияда бўлиб ўтадиган лицензион турнир ва Токио-2020 Олимпиадасига тайёргарлик доирасида ҳам йўлга қўйишни таклиф қилди. Шунингдек, Ўзбекистон ва Афғонистон Миллий Олимпия қўмиталари ўртасида ҳамкорлик меморандумларини имзолаш масалалари ҳам муҳокама қилинди.

Шундан сўнг музокараларнинг амалий тасдиғи сифатида Ўзбекистон ва Афғонистон волейбол федерациялари ўртасида ҳамкорлик меморандуми имзоланди.

Тадбир якунида МОҚ Бош котиби қўшни мамлакатлар билан йўлга қўйилаётган бундай ҳамкорликдан мамнун эканлигини билдириб, меҳмонларга эсталик совғаларини тақдим этди.