Волкановски UFC енгил вазн чемпионлигини ҳам кўзламоқда

Кеча у беш раунд тўлиқ давом этган драматик жангда Брайан Ортегани очколар ҳисобига кзра мағлубиятга учратган эди. 

"Мен жангни муддатидан аввал якунлашим ҳақида айтгандим. Бунга жуда яқин ҳам келдим. Мухлислар ҳақиқий урушга гувоҳ бўлишди. Томошабинларбоп жанг ташкил этиб берганимиздан хурсанд бўлдим", - дейди австралиялик чемпион UFC 266 турниридан кейин ўтказилган матбуот анжуманида.

Чемпион ўз сўзида давом этар экан, камарини бой бериб қўйишига бир баҳя қолганига ҳам урғу қаратди:

"Ортега мени шунчалик қаттиқ бўғиб олгандики, ўша пайт 'Жин урсин, ҳозир камаримни бой бераман" деб ҳам ўйлай бошладим. Ўзимдан ғалати овозлар чиқаётганини эшитиб турардим. Бу даҳшатнинг ўзгинаси эди". 

Алекс кейинги рақиби сифатида кимни кўриш истагида эканини ҳам маълум қилди:

"Макс Холлоуэй ва Яир Родригес ўртасида ўтказиладиган жанг ғолибига қарши октагонга чиқмоқчиман. Улар ноябрда ўзаро тўқнаш келишади. Кейин енгил вазн UFC чемпионига ҳам чақирув билан чиқмоқчиман. Австралия ва Янги Зеландиядаги эпидемиологик вазият туфайли оилам ва жамоам билан Лас-Вегасда қоламан", - дея сўзига якун ясаган Волкановски. 

Эслатиб ўтамиз, енгил вазн тоифасида Чарльз Оливейра UFC чемпиони бўлиб турибди. Оливейра 11 декабрь куни Дастин Порьега қарши жангда камарини ҳимоя қилиши керак. UFC 269 турнири Лас-Вегасда ўтказилади. Оливейра - Порье жанги оқшомнинг марказий тўқнашуви бўлади.