World Boxing. Уччала боксчимиз ҳам финал йўлланмасини қўлга киритди

Мусобақанинг бешинчи кун дастурида 3 нафар боксчимиз 1/2 финал жангларида рингга чиқди ва қувонарлиси, уларнинг бари рақибларини яққол устунлик билан мағлубиятга учратди. Жаҳон чемпиони Миразизбек Мирзахалилов гватемалалик Жосе Фелипега ҳеч қандай имконият қолдирмади - 5:0. 

Айнан у боксчиларимизнинг бугунги иштирокини бошлаб берди. Кейин Жавоҳир Умматалиев (-80 кг) қозоғистонлик Диас Молжигитовни, Акмалжон Исроилов (-85 кг) эса польшалик Якуб Страшевскини таслим этди ва финалга йўл олди. 

Боксчиларимиз иштирокидаги жанг натижалари:

-55 кг: Миразизбек Мирзахалилов - Жосе Фелипе (Гватемала) соат 5:0

-80 кг: Жавоҳир Умматалиев - Диас Молжигитов (Қозоғистон) 5:0

-85 кг: Акмалжон Исроилов - Якуб Страшевски (Польша) 5:0

Эслатиб ўтамиз, бир кун олдин Париж-2024 Олимпиадаси иштирокчиси Тўрабек Ҳабибуллаев (-90 кг), энг оғир (+90 кг) вазндаги чарм қўлқоп устамиз Жаҳонгир Зокиров, Асилбек Жалилов (-50 кг) ва Фазлиддин Эркинбоев (-75 кг) рақибларини мағлуб этиб, финалга йўл олганди. Финал жанглари эртага ўтказилади.