World Boxing учинчи босқичи якунларига кўра Қозоғистон биздан ўзиб кета оладими? (Жадвал)

Ўзбекистон эркаклар терма жамоасисиз ўтказилаётган нуфузли мусобақанинг финал жангларида 12 нафар қозоғистонлик боксчи олтин медаллар учун рингга кўтарилади. Мезбонлар фақат аёлларда - 54, 57, 65, 80 кг, эркаклар ўртасида эса 60, 64, 70 ва 90 кг ваз тоифаларида финалга чиқа олишмади. Қолган барча вазнларда бугун улар иштирокидаги финал жанглари ўтказилади. 

Ҳозирча Жаҳон кубогининг икки босқичи якунларига кўра медаллар жамғариш бўйича Ўзбекистон терма жамоаси 11 та олтин, 3 та кумуш, 3 та бронза медали билан якка пешқадам бўлиб турибди. Польша 7 та олтин, 7 та кумуш, 15 та бронза медали билан иккинчи ўринни банд этган. Кучли бешликдан Италия, Бразилия ва Қозоғистон терма жамоалари жой олган. 

Агар бугун қозоғистонлик боксчилар 12 та финалдан 9 тасида ғалаба қозонишса, умумий жадвалди Ўзбекистондан ўтиб кетишади. Боксчи қизларимиздан биргина Навбаҳор Ҳамидова бугун финалда туркиялик Олимпиада чемпионига қарши рингга кўтарилади. Польшадан ҳеч ким финалга етиб кела олмади ва шу боис биздан ўтиб кетиши мумкин бўлган ягона давлат бу - Қозоғистон!