WTA Finals. Қозоғистонлик теннисчи гуруҳ ғолиби сифатида 1/2 финалга чиқди

Дунёнинг олтинчи ракеткаси бўлиб турган Елена Рибакина гуруҳ босқичининг уччала учрашувида ҳам ғалаба қозониб, плей-оффга биринчи ўрин билан йўл олди. Қозоғистонлик теннис маликаси WTA рейтингида 10-ўринни эгаллаб турган россиялик Екатерина Александровани икки сетда ҳам бир хил ҳисобда мағлубиятга учратди - 6/4, 6/4. 

Бу билан Елена теннисчиларнинг ўзаро учрашувларидаги ҳисоб мувозанатини тиклаб қўйди - 3:3. Бу Александрова учун ушбу турнирдаги илк ва шу билан бирга сўнгги учрашув бўлди. Боиси, у жароҳат сабаб сафдан чиққан америкалик Мэдисон Кизнинг ўрнини эгаллаганди. 

Учрашув давомида Рибакина 7, Александрова 6 та эйс зарбасини амалга оширди. Қўшхатолар рус теннисчисида кўпроқ бўлди - 3 га 2. Брейклар бўйича эса табиийки, устунлик ғолиба томонида бўлди - 3 га 1.