Хабиб Дана Уайтга: "Бу мутлақо ёлғон!"

Россиялик аралаш яккакураш устаси ўзи ҳақида шундай гапирган Дананинг баёнотига кескин муносабат билдирди.

"Баъзан шундай сарлавҳаларни ўқийман. Мен, албатта, интернетдаги ҳар бир ахлатни шарҳлашни ёқтирмайман, лекин Дана шундай гапларни айтганида, бу ҳамма жойга тарқалади. Мен шундай дейман: Яратган гувоҳ, бу мутлақо ёлғон. Менга ҳеч ким ҳеч қачон бу миллионларни бермаган ва кўп пул топганим учун спортни тарк этганим йўқ. Буларнинг бари ёлғон. Ҳақиқатни бутун дунё билади - мен бу ҳақда бир неча бор айтганман ва такрорлашнинг ҳожати йўқ", - деб ёзди UFC`нинг енгил вазн тоифасидаги собиқ чемпиони ижтимоий тармоқдаги саҳифасида.

Эслатиб ўтамиз, 2020 йилнинг октябрь ойида Хабиб Нурмагомедов Жастин Гэтжини бўғиш усулида мағлуб этганидан кейин фаолиятини якунлаганини эълон қилганди. Ўшанда у онасининг талаби билан бу қарорга келганини айтган эди.