Хабиб Махачев - Маддалена жангини эълон қилди

Махачев кутилганидек яримўрта вазнда амалдаги дивизион чемпиони Жек Делла Маддаленага қарши октагонга чиқади. Ушбу чемпионлик жанги ноябрь ойида АҚШнинг Нью-Йорк шаҳрида ташкил этиладиган UFC 322 турнирининг марказий тўқнашуви бўлади.

Бу ҳақда айнан Нью-Йоркда журналистлар ва мухлислар билан ўтказилган матбуот анжуманида Исламнинг бош мураббийи Хабиб Нурмагомедов хабар берди.

"Улар шу ерда, Нью-Йоркда жанг ўтказишади. Али Абдел-Азиз бу хабарни ошкор қилганим учун мендан хафа бўлса керак. Бу унинг муаммоси. UFC билан Али гаплашади. Лекин бизга жанг "Мэдисон Сквер Гарден"да бўлади деб тасдиқдан ўтган хабарни айтишди", – деди Хабиб. 

Рақамланган UFC 322 турнирининг санаси ҳали расман эълон қилинмаган. Лекин катта эҳтимол билан бу кутилаётган турнир 15 ноябрь куни бўлиб ўтади. Австралиялик Жек Делла Маддалена шу йилнинг май ойида Белал Муҳаммадни очколар ҳисобига кўра мағлуб этиб, яримўрта вазн чемпиони бўлди. Ислам Махачев эса енгил вазндаги камарини вакант қолдириши ортидан Маддаленага қарши октагонга чиқиш ҳуқуқини қўлга киритди.