Халқаро оғир атлетика федерацияси Бош котиби МОҚда меҳмон бўлди

Аргентинада ташкил этиладиган III ўсмирлар Олимпия ўйинларига лицензия берувчи мазкур нуфузли мусобақага Урганч шаҳри мезбонлик қилади. Мазкур қитъа чемпионатига кўрилаётган тайёргарлик жараёни билан бевосита танишиш мақсадида 16 март куни юртимизга Халқаро оғир атлетика федерацияси Бош котиби ироқлик Муҳаммад Ҳасан Жалуд етиб келганди. 

Ўзбекистон оғир атлетика федерацияси раисининг биринчи ўринбосари Шаҳрилло Маҳмудов ҳамроҳлигида Муҳаммад Ҳасан Жалуд Урганчга йўл олди. У ерда Осиё чемпионатига кўрилаётган тайёргарлик жараёни билан яқиндан танишди. Меҳмонхоналар ҳолати, спорт мажмуасидаги шароитлар кўздан кечирилди.

Шундан сўнг куннинг иккинчи ярмида меҳмон Тошкентга қайтиб келди ва Ўзбекистон Миллий олимпия қўмитасига ташриф буюрди. Уни МОҚда Бош котиб Жасур Матчанов кутиб олди. 

Томонлар учрашувда мусобақага кўрилаётган тайёргарлик борасида фикр алмашишди. Ўз навбатида меҳмон Урганчдаги шароитлардан кўнгли тўлганлиги, қолаверса Хивани айланиб, у ердан бир олам таассурот билан қайтганлиги, очиқ осмон остидаги музей шаҳар номи билан машҳур бўлган Хивани бутун дунёда яхши билишлари ҳақида тўлқинланиб гапирди. 

Қолаверса, мусобақа ўтказиладиган манеж, меҳмонхоналар гарчанд 3-4 юлдузли бўлсада, халқаро стандартларга мос 5 юлдузли меҳмонхоналардан асло қолишмаслиги, бу борада Урганчда мусобақани қабул қилиш учун хеч қандай муаммо йўқлигини билдирди.

Ўз навбатида МОҚ Бош котиби Жасур Матчанов ҳам Ўзбекистон ушбу мусобақага 2017 йилдан буён тайёргарлик кўраётганини, МОҚ Ўзбекистон оғир атлетика федерацияси билан яқин ҳамкорликни йўлга қўйганлиги ва бежизга ушбу мусобақа Урганчга ишониб топширилмаганлигига изоҳ берди.