Халқаро олимпия куни “Ёшлик”да ҳам давом этди

Бунинг баробарида, оммавий юриш, югуриш ва вело марафонлар, турли миқёсдаги мусобақалар ва спорт турлари бўйича кўргазмали чиқишларда  касби ва кори, қолаверса, ёшидан қатъий назар барча бирдек фаоллик кўрсатди. Муболаға эмас, бу ҳамюртларимизга хуш кайфият, қувончли лаҳзаларни туҳфа этди. 

Халқаро Олимпия куни муносабати билан ўтказилган “Халқ сайли” умуммиллий спорт тадбирлари  6 июль куни эрталаб Урганч шаҳрида оммавий юриш марафони билан бошланиб, кечқурун “Ёшлик” спорт мажмуасида давом этди. У ерда спортчилар ўзларининг мафтункор кўргазмали чиқишлари билан олқишларга сазовор бўлишди. Картинг усталарининг маҳорати ҳам йиғилганлар эътиборидан четда қолмади. Мажмуа стадионининг марказий қисмида “жонли” равишда ясалган Олимпиада ўйинлари рамзи - беш халқа эса ҳамюртларимизнинг Олимпия ҳаракати ривожига бефарқ эмасликларини, спортга ҳамнафас эканликларини намоён этди.

Мазкур тадбирнинг очилиш маросимида сўзга чиққан Хоразм вилояти ҳокими ўринбосари С.Салаев мажмуага йиғилганларни спорт байрами билан қутлаб, Халқаро Олимпия кунига бағишлаб уюштирилган  мусобақаларни юқори савияда ташкил қилганлиги учун бир гуруҳ таълим муассасалари, ҳокимликлар ва ташкилотларни вилоят ҳокимининг фахрий ёрлиғи ва қимматбаҳо совғаси билан тақдирлади. Тақдирланганлар орасида вилоят жисмоний тарбия ва спорт бошқармаси(бошлиғи Шокир Мадаминов) ҳамда бошқарма тасарруфидаги Спорт ўйинлари ва енгил атлетикага ихтисослаштирилган болалар-ўсмирлар спорт мактаби(директори Жамоладдин Абдуллаев) ҳам бор эди. “Ёшлик” спорт мажмуасида бўлиб ўтган “Халқ сайли” умуммиллий спорт тадбирига хоразмлик таниқли ва хушовоз хонандаларнинг гала-концерти ҳам файз ва тароват, жўшқинлик олиб кирди. 

Икром ХУДОЙБЕРГАНОВ, Урганч шаҳридан