Халқаро таэквондо ИТФ федерацияси икки нафар ҳамюртимизни юксак мақомга муносиб кўрди

Бош қароргоҳи Австриянинг Вена шаҳрида жойлашган ушбу нуфузли спорт ташкилоти Ўзбекистон таэквондо ИТФ Миллий ассоциациясининг президенти Лазиз Ҳасановни 7-ДАН (мастер) қора белбоғ ҳамда Халқаро тоифадаги инструктор сертификатлари билан мукофотлади.

Шунингдек, Халқаро таэквондо ИТФ федерацияси томонидан яна бир ҳамюртимиз, Ўзбекистон таэквондо ИТФ Миллий ассоциациясининг Бухоро вилояти бўлими раҳбари Убайт Мукаррамовга 6-ДАН қора белбоғ ҳамда Халқаро тоифадаги инструктор сертификати топширилди.

Таъкидлаш жоиз, жорий йил 25 август куни Халқаро таэквондо ИТФ федерациясининг халқаро онлайн семинари ўтказилган ва унда ўзбекистонлик мутахассислар ҳам иштирок этишганди. Бугун ҳамюртларимизга тегишли сертификатлар Ўзбекистонга етиб келди.

Спортчи ёки тренер Халқаро таэквондо ИТФ федерациясининг 7-ДАН даражасини олиши учун ушбу спорт турида камида 30 йил фаолият олиб борган бўлиши лозим. Лазиз Ҳасанов эса 31 йилдирки ушбу спорт турини Ўзбекистонда оммалаштириш йўлида жонбозлик кўрсатиб келмоқда.

Бу эса юртимизда нафақат Олимпия спорт турлари, балки ноолимпия ва миллий спорт турларини ривожлантиришга ҳам алоҳида эътибор қаратилаётганидан далолат беради.