Хамзат Чимаев фаолиятидаги энг қийин рақиб ким бўлганини айтди

"Икрам Алискеров билан "Brave"да жанг қилганмиз. У яхши йигит ва UFC'да жанг қилиши керак эди. Адашмасам, менга мағлуб бўлганидан сўнг у бешта жангда ғалаба қозонди. Бу йигит ҳақиқатдан ҳам яхши жангчи эди" - деди швециялик жангчи журналистлар билан бўлган суҳбатда.

Хамзат Чимаев ва Икрам Алискеров ўртасидаги жанг 2019 йилнинг апрель ойида Иорданиядаги "Brave CF" турнирида бўлиб ўтган ва биринчи раунддаёқ Чимаевнинг нокаути билан якунланганди.

Чимаевга мағлуб бўлганидан сўнг, 29 ёшли россиялик тўртта жангда ғалаба қозонган. Шундан учтасини "Brave" байроғи остида қўлга киритган. Сўнгги тўртинчи ғалабасига Майамидаги Еagle FC 46 турнирида собиқ UFC ва Bellator На-Шонни мағлуб этган ҳолда эришган.

Эслатиб ўтамиз, 27 ёшли Хамзат Чимаев 10 апрель куни Жексонвилда бўлиб ўтадиган UFC 273 турнирида октагонга қўтарилади. Унга ярим ўрта вазн тоифасида собиқ UFC чемпиони Гилберт Бернс рақиблик қилади.