Хамзат Чимаевни 2025 йилда кутаётган энг муҳим жанг!

БАА шарафини ҳимоя қилаётган чеченистонлик аралаш яккакураш устаси чемпион Дрикус Дю Плесси ҳамда даъвогар Шон Стрикленд жанги ғолибига қарши октагонга чиқмоқчи. Бу ҳақда дивизионнинг собиқ чемпиони, айни пайтда UFC жангларида шарҳловчилик қилаётган Майкл Биспинг хабар берди.

"У 2025 йилда учта жанг ўтказиши керак. Шон Стрикленд ва Дрикус Дю Плессидан бири – бу Хамзат жанг қилиши керак бўлган ҳамда барча кутаётган жанг. У бу йил Роберт Уиттакерни ажойиб тарзда мағлуб этди. Рақибини бўғиш жараёнида тишини синдириб юборди. Чимаев 2025 йилда мухлислар кутаётган жангларни тақдим этиши лозим", - деди Биспинг. 

Эслатиб ўтамиз, шу йилнинг октябрь ойида мағлубият нималигини билмай келаётган Хамзат Чимаев UFC октагонидаги саккизинчи ғалабасини қўлга киритганди. У биринчи раунддаёқ Роберт Уиттакерни мағлубиятга учратган эди. Дрикус Дю Плесси - Шон Стрикленд жанги 8 февраль куни Австралиянинг Сидней шаҳрида ташкил этиладиган UFC 312 турнирининг марказий тўқнашуви бўлади.