Ханчжоу-2022, Париж-2024: Дзюдочиларимизнинг тайёргарлик режалари муҳокама қилинди

Шубҳасиз, барчамиз мазкур анъана давом этишини истаймиз ва бунинг учун барча режалар, дастурлар ишлаб чиқилмоқда. МОҚ раиси Ўзбекистон дзюдо федерациясига ташриф буюриб, Ханчжоу-2022 Осиё ўйинлари ва Париж-2024 Олимпия ўйинларига тузилган тайёргарлик режалари билан танишди. 

Тадбирда МОҚ раиси Рустам Шоабдураҳмонов, Ўзбекистон дзюдо федерацияси раҳбарияти ва мутасадди вакиллари, МОҚ ходимлари, мураббийлар иштирок этишди.

Тақдимотни Ўзбекистон дзюдо федерацияси раиси ўринбосари Шоатҳам Исроилов олиб борди. Сўз ўрнида Рустам Шоабдураҳмонов режалар борасида ўз фикрларини билдириб ўтди.

“Дзюдо ёшларимиз орасида энг севимли спорт турларидан бири. Бунга спортчиларимизнинг халқаро майдонларда эришаётган ютуқлари сабабдир. Ҳукуматимизнинг қўллаб-қувватлаши билан яна бир неча кундан сўнг пойтахтимизда илк бор “Катта дубулға” турнири ўтказилади. Бу эса юртимизда ушбу спорт тури ва соғлом турмуш тарзи тарғиботида муҳим аҳамиятга эга”, – деди МОҚ раиси.

Мутасаддиларнинг маълумот беришича, айни пайтда юртимизда 21 мингдан зиёд ўғил-қизлар мазкур спорт тури билан шуғулланади. Тақдимотда ушбу ёшлар орасидан энг сараларини танлаб олиш, кучли селекция ишларини йўлга қўйиш алоҳида мавзуга айланиб кетди.

Шунингдек, терма жамоамиз етакчилари сиймосида ёшларга ўрнак бўладиган қаҳрамонларни гавдалантириш, Ханчжоу ва Париж ўйинларига тайёрларлик йўлида ташкил қилинадиган ўқув-машғулот йиғинлари ва халқаро турнирлар, ҳакамлар малакасини ошириш каби йўналишларда атрофлича фикр билдирилди.