19 авг 11:14
Янгиликлар

Бошқалар

Хонободда Баҳодирлар ўйини бўйича Жаҳон Кубоги бўлиб ўтди

Андижон вилоятининг сўлим Хонобод шаҳрида бир вақтнинг ўзида икки мусобақа - Баҳодирлар ўйини бўйича Жаҳон Кубоги ҳамда Андижон вилояти ҳокими соврини учун халқаро турнир ташкил этилди.

Ушбу нуфузли мусобақаларда дунёнинг 26 давлатидан полвонлар совринли ўринлар учун баҳс олиб борди. Беллашувлар 95, 105, 125 ва +125 кг вазн тоифаларида ўтказилди. 95 кг вазнда терма жамоамиз аъзоси Нуриддин Эргашев чемпионлик шоҳсупасига кўтарилди. Ҳамюртимиз Шерзод Ражабов кумуш, қозоғистонлик Мирзатай Баглан бронза медалига сазовор бўлди.

105 кг вазнли полвонлар баҳсида терма жамоамизнинг яна бир аъзоси Шодилбек Эргашев чемпион бўлди. Элёр Ҳамидов кумуш, беларуслик Влад Илишшен бронза медали билан тақдирланди.

125 кг вазнда россиялик Давид Шамей олтин медалга эга чиқди. Дилмурод Қурбонов кумуш, ҳиндистонлик Кришна Салах бронза медалини қўлга киритди. Энг оғир +125 вазн тоифасида рус полвони Давид Шамей мутлақ ғолиб бўлди. Кумуш медаль польшалик Марк Чайковский, бронза эса грузиялик Чабуха Чихадзега насиб этди.

Ғолиб ва совриндорларни тантанали тақдирлаш маросимида Андижон вилояти ҳокими, Баҳодирлар ўйинлари ва тош кўтариш бўйича Осиё федерацияси президенти Шуҳратбек Абдураҳмонов иштирок этди.

Мусобақа якунлангач, Осиё Баҳодирлар ўйинлари ва тош кўтариш федерациясининг навбатдаги йиғилиши бўлиб ўтди. Унда бир қатор масалалар кўрилди. Хусусан, Озодбек Саидов Осиё Баҳодирлар ўйинлари ва тош кўтариш федерацияси президентининг бош маслаҳатчиси этиб сайланди.